బోయపాటి డైరెక్షన్‌లో హీరో ఫిక్స్

కరోనాతో డల్ అయిపోయిన సినీ పరిశ్రమకి అఖండతో పండుగ కళ తెచ్చాడు బోయపాటి. బాలయ్య కెరీర్‌‌లోని బిగ్గెస్ట్ బ్లాక్‌బస్టర్స్‌లో ఒకటిగా నిలిచి చరిత్ర సృష్టించిందీ సినిమా. ఆ జోష్‌లో ఏమాత్రం గ్యాప్‌ లేకుండా నెక్స్ట్ సినిమాని ప్రకటించేశాడు బోయపాటి.     

రామ్‌ పోతినేనితో నెక్స్ట్ సినిమా చేయబోతున్నాడు బోయపాటి. శ్రీనివాస చిట్టూరి ఈ చిత్రాన్ని నిర్మిస్తున్నారు. ఆయన ప్రస్తుతం రామ్‌తో ‘ద వారియర్’ మూవీని తీస్తున్నారు. ఆ సినిమాని రెండు భాషల్లో తీస్తుంటే.. బోయపాటి సినిమాని మాత్రం ప్యాన్ ఇండియా రేంజ్‌లో తీస్తున్నట్లు శ్రీనివాస చెప్పారు. ఎప్పటి నుంచో బోయపాటితో సినిమా చేయాలని ఉందని, ఇప్పటికి కుదిరిందని, అది కూడా రామ్‌తో కావడం యమా హ్యాపీగా ఉందని అన్నారాయన.     

ఇస్మార్ట్ శంకర్‌‌ తర్వాత మాస్ హీరోగా సత్తా చాటుతున్నాడు రామ్. తన ఫిజిక్‌, స్టైల్, బాడీ లాంగ్వేజ్‌తో పాటు స్టోరీ సెలెక్షన్‌ని కూడా పూర్తిగా మార్చేశాడు. ఈ క్రమంలో బోయపాటితో మూవీ సెట్ చేశాడంటే అది ఏ రేంజ్ మాస్ యాక్షన్ ఎంటర్‌‌టైనర్‌‌ అయ్యుంటుందో ఊహించవచ్చు.      

అయితే బోయపాటికి బాలయ్యతో కలిసొచ్చినట్టుగా ఇతర హీరోలతో కలిసి రాదు అనే కామెంట్స్‌ వినిపిస్తూ ఉంటాయి. సింహా, లెజెండ్, అఖండలు విజయం సాధించినట్టుగా ఎన్టీఆర్, రామ్‌చరణ్ లాంటి హీరోలతో తీసిన సినిమాలు సక్సెస్ కాకపోవడమే అందుకు కారణం. మరి రామ్‌తోనైనా హిట్టు కొట్టి ఆ నెగిటివ్ ఇమేజ్‌ని తుడిచేసుకుంటాడేమో చూడాలి.