అజిత్‌ను వదిలేసి అతడిపై పడ్డాడు

అజిత్‌ను వదిలేసి అతడిపై పడ్డాడు

ఒకప్పుడైతే ఒకే దర్శకుడితో ఓ హీరో పదుల సంఖ్యలో సినిమాలు చేసేవాడు. వరుసబెట్టి కూడా సినిమాలు లాగించేవాడు. కానీ ఇప్పుడు రోజులు మారాయి. ఒక దర్శకుడు, హీరో కలిసి రెండో మూడో సినిమాలు చేస్తేనే ఆశ్చర్యపోయే పరిస్థితి. ఇక ఆ ఇద్దరు కలిసి నాలుగు సినిమాలు చేయడం.. అందులోనూ ఆ దర్శకుడు వరుసగా ఆ సినిమాలు తీయడం అంటే అరుదైన విషయమే. తెలుగులో ‘శౌర్యం’ సినిమాతో దర్శకుడిగా పరిచయమైన శివ.. తమిళంలో ఈ అరుదైన ఫీట్ సాధించాడు.

‘వీరం’తో మొదలు పెట్టి.. ‘వేదాళం’, ‘వివేగం’, ‘విశ్వాసం’ అంటూ తన నాలుగు సినిమాల్ని వరుసగా అజిత్‌తోనే చేశాడు. ఇందులో మూడు సినిమాలు పెద్ద విజయం సాధించాయి. ‘వివేగం’ ఒక్కటే ఫ్లాప్ అయింది. ఐతే ఈ సినిమా తర్వాత స్వయంగా అజిత్ అభిమానులే ఇక మా హీరోను వదిలేయంటూ అతడికి విన్నపాలు చేశారు. కానీ అతను అజిత్‌కు ‘విశ్వాసం’ అనే రికార్డ్ బ్రేకింగ్ మూవీ ఇచ్చి కానీ నిష్క్రమించలేదు.

ఎట్టకేలకు శివ ఆరేడేళ్ల విరామం తర్వాత వేరే హీరోతో సినిమా చేయబోతున్నాడు. ఆ హీరో మరెవరో కాదు.. సూర్య. తమిళంలో శివ దర్శకుడిగా పరిచయం అయింది సూర్య తమ్ముడు కార్తి సినిమాతోనే. ‘విక్రమార్కుడు’ను ‘సిరుత్తై’గా రీమేక్ చేసి సూపర్ హిట్ కొట్టాడు. తర్వాత అజిత్ దగ్గరికి వెళ్లాడు. మాస్ పల్స్ బాగా తెలిసిన శివతో మంచి మసాలా సినిమా చేసి హిట్టు కొట్టాలని చూస్తున్నాడు సూర్య. అతను చివరగా ఎప్పుడు హిట్టు కొట్టాడో కూడా జనాలు మరిచిపోయారు. తనదైన శైలిలో ప్రయోగాలు చేశాడు.

మధ్యలో కొన్ని మాస్ సినిమాలు చేశాడు. ఏవీ ఫలితాన్నివ్వలేదు. చివరగా వచ్చిన ‘ఎన్జీకే’ డిజాస్టర్ అయింది. త్వరలోనే రాబోతున్న ‘కాప్పన్’ (బందోబస్త్) సంగతేంటో చూడాలి. సూర్య కజిన్ జ్ఞానవేల్ రాజా.. సూర్య-శివ సినిమాను నిర్మించబోతున్నాడు. మరి అజిత్‌కు ఇచ్చినట్లే శివ.. సూర్యకు కూడా మంచి హిట్ ఇస్తాడేమో చూడాలి.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English