ఇంట్లోనే ఫస్ట్ డే ఫస్ట్ షో.. అంత వీజీనా?

ఇంట్లోనే ఫస్ట్ డే ఫస్ట్ షో.. అంత వీజీనా?

ఫస్ట్ డే ఫస్ట్ షో పేరుతో ‘జియో’ ద్వారా ఇంట్లోనే కూర్చుని తొలి రోజు ఉదయం షో చూసే అవకాశం కల్పిస్తామంటూ రిలయన్స్ అధినేత ముకేశ్ అంబానీ సోమవారం చేసిన ప్రకటన కలకలం రేపింది. దేశవ్యాప్తంగా ఈ అంశం చర్చనీయాంశమైంది. దీనిపై మిశ్రమ స్పందన వ్యక్తమైంది.

కొందరేమో కష్టపడి థియేటర్లకు వెళ్లాల్సిన పని లేదని.. టికెట్ల కోసం కొట్లాడే అవసరం లేదని.. హాయిగా ఇంట్లోనే కూర్చుని సినిమా చూసుకోవచ్చని సంతోషం వ్యక్తం చేస్తుంటే.. థియేటర్ ఇచ్చే ఎక్స్‌పీరియన్స్ మరేదీ ఇవ్వదని.. సినిమా వినోదాన్ని పూర్తిగా టీవీకి మార్చేయడం కరెక్ట్ కాదని ఇంకొందరు అభిప్రాయపడుతున్నారు. థియేటర్ల యాజమాన్యాలు ఈ ప్రతిపాదనను పూర్తిగా వ్యతిరేకిస్తున్నాయి. ఆల్రెడీ పీవీఆర్ లాంటి సంస్థలు దీన్ని ఖండిస్తూ ప్రకటనలు కూడా ఇచ్చేశాయి.

ఐతే దీనిపై ఎవరి అభిప్రాయం ఎలా ఉన్నా.. ఇది ఎంత వరకు ఆచరణ సాధ్యం అనేది కూడా చూడాలి. ముకేశ్ అంబానీ అన్నాడంటే ఆ మాటను తేలిగ్గా తీసుకోలేం. ఎలాగైనా అనుకున్నది సాధించగలరు. కానీ ఆయన చెబుతున్న ప్రతిపాదనకు సినీ పరిశ్రమ ఆమోదం వేయకుండా సాధ్యం కాదు.

అల్టిమేట్‌గా థియేటర్ల నుంచి వచ్చే ఆదాయమే అత్యంత కీలకమైంది కాబట్టి వాటి యాజమాన్యాలు వ్యతిరేకిస్తున్న ప్రతిపాదనకు సినీ నిర్మాతలు ఎలా అంగీకరిస్తారన్నది ప్రశ్న. తమ ఆదాయానికి గండి కొట్టే ఈ ప్రతిపాదనకు థియేటర్ల యాజమాన్యాలు ససేమిరా అంటాయి. నిర్మాతల మీదా ఒత్తిడి తెస్తాయి.

మరోవైపు నేరుగా ఇంట్లో టీవీలో, మొబైల్లో ఫస్ట్ డే ఫస్ట్ షో చూసే అవకాశం పైరసీదారులు ఊరుకుంటారా? ఏదో ఒక టెక్నాలజీ ద్వారా మధ్యాహ్నానికల్లా ఒరిజినల్ ప్రింటు బయటికి తీసేస్తారు. పైరసీ జడలు విప్పుతుంది. మరీ తక్కువ మొత్తానికే ఈ షో చూసే అవకాశం కల్పిస్తే.. మున్ముందు జనాలు థియేటర్లకు రావడమే మానేస్తారు. అలాగని ఎక్కువ రేటు పెడితే ఆ సౌలభ్యాన్ని ఉపయోగించుకోకపోవచ్చు.

ఇలా ఈ ప్రతిపాదనలో అనేక కోణాలు దాగున్నాయి. ఐతే థియేటర్లు దొరకట్లేదని బాధపడే చిన్న సినిమాల నిర్మాతలు మాత్రం దీనికి అంగీకరించి ఓ మోస్తరు ధరతో సినిమాను ఇంట్లో చూసుకునే అవకాశం కల్పించడానికి ఒప్పుకుంటారేమో. ఇలాంటి సినిమాలకు ఈ ప్రతిపాదన బాగానే వర్కవుట్ కావచ్చు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English