అల్ల‌రోడి హీరోయిన్.. అయ్యో పాపం

అల్ల‌రి న‌రేష్ కెరీర్-ఈవీవీ స‌త్య‌నారాయ‌ణ కాంబినేష‌న్లో వ‌చ్చిన బెండు అప్పారావ్ ఆర్ఎంపీ సినిమాలో సెకండ్ హీరోయిన్‌గా న‌టించిన మేఘ‌నా రాజ్ గుర్తుందా? ఈ అమ్మాయి స్వ‌స్థ‌లం బెంగ‌ళూరు. తెలుగులో బ్రేక్ రాక‌పోవడంతో క‌న్న‌డ సినిమాల‌కే ప‌రిమితం అయింది. అక్క‌డ మంచి స్థాయినే అందుకుంది. ఈ అమ్మాయికి ఇప్పుడు పెద్ద క‌ష్ట‌మే వ‌చ్చింది. ఆమె ఆశ‌ల‌న్నీ ఒక్క‌సారిగా కుప్ప‌కూలిపోయే ప‌రిణామం జ‌రిగింది.

ఆదివారం ఉద‌యం గుండెపోటుతో మ‌ర‌ణించిన చిరంజీవి స‌ర్జా.. మేఘ‌న భ‌ర్త‌. సీనియ‌ర్ హీరో అర్జున్‌కు మేన‌ల్లుడు కూడా అయిన చిరంజీవి హ‌ఠాత్తుగా గుండెపోటుతో చ‌నిపోవడం సౌత్ ఫిలిం ఇండ‌స్ట్రీకి పెద్ద షాకే. అత‌డి వ‌య‌సు 39 ఏళ్లే. ఎలాంటి అనారోగ్య స‌మ‌స్య‌ల్లేవంటున్నారు. కానీ ఇలా ఎందుకు జ‌రిగిందో ఏమో?

చిరంజీవి స‌ర్జాతో మేఘ‌న ప‌దేళ్ల పాటు ప్రేమ‌లో ఉండ‌టం విశేషం. హీరో హీరోయిన్లుగా ఇద్ద‌రి కెరీర్ బాగా న‌డుస్తుండ‌టంతో పెళ్లిని వాయిదా వేసుకుంటూ వ‌చ్చారు. చివ‌రికి 2018 మేలో పెళ్లి చేసుకున్నారు. అప్ప‌ట్నుంచి చాలా సంతోషంగా ఉంటున్నారు. ఇద్ద‌రివీ సినీ నేప‌థ్యం ఉన్న కుటుంబాలే. మేఘ‌న తండ్రి సుంద‌ర్ రాజ్ క‌న్న‌డ‌లో ప్రముఖ న‌టుడు.

పెళ్లి త‌ర్వాత చిరంజీవి, మేఘ‌న చాలా సంతోషంగా గడ‌పుతూ త‌ర‌చుగా సోష‌ల్ మీడియాలో పోస్టులు పెట్టేవాళ్లు. వారం కింద‌ట కూడా క‌లిసి డిన్న‌ర్ చేస్తూ ఫొటో షేర్ చేశారు. అందులో చిరంజీవి చాలా హుషారుగా క‌నిపించాడు. ఇప్పుడు అంద‌రినీ క‌ల‌చివేస్తున్న విష‌యం ఏంటంటే.. మేఘ‌న ప్రెగ్నెంట్ కూడా అట‌. ఈ సంగ‌తి తెలిసిన‌ప్ప‌టి నుంచి చాలా హ్యాపీగా ఉన్న వీరి కుటుంబాలు ఇప్పుడు పెను విషాదంలో మునిగిపోయాయి. మేఘ‌న ప‌రిస్థితి చూసి అంద‌రూ క‌న్నీళ్లు పెట్టుకుంటున్నారు.