ఎప్పుడో రాబోయే సినిమాకు ఇప్పట్నుంచే ప్రచారం

ఎప్పుడో రాబోయే సినిమాకు ఇప్పట్నుంచే ప్రచారం

ఏడాది పాటు అసలు సినిమానే చేయకుండా ఖాళీగా ఉన్నాడు అల్లు అర్జున్. కానీ ఇప్పుడు ఒకేసారి మూడు సినిమాలు కమిటైపోయాడు. త్వరలోనే అందులో ఒక సినిమాను మొదలుపెట్టేస్తున్నాడు. అది త్రివిక్రమ్ దర్శకత్వంలోనిదన్న సంగతి తెలిసిందే. దీని తర్వాత వరుసలో ఉన్నది సుకుమార్ సినిమా. ఆపై వేణు శ్రీరామ్ డైరెక్షన్లో దిల్ రాజు నిర్మించే ‘ఐకాన్’ చిత్రం చేయబోతున్నాడు. ఐతే బన్నీ ముందు చేయబోయే రెండు సినిమాలకు టైటిలే ఖరారు కాలేదు. కానీ చివరగా చేయనున్న చిత్రానికి మాత్రం పేరు ఖరారైంది. స్క్రిప్టు కూడా పక్కాగా ఉన్నట్లు చెబుతున్నారు. ఐతే ఇంకో ఏడాది తర్వాత కానీ మొదలుపెట్టే అవకాశం లేని ఈ చిత్రానికి ఇప్పట్నుంచో బన్నీ ప్రచారం కల్పిస్తుండటం విశేషం.

గురువారం బన్నీ హైదరాబాద్‌లోని జూబ్లీహిల్స్‌లో ఓటు వేసేందుకు వచ్చాడు. ఈ సందర్బంగా నెత్తిన పెట్టుకున్న టోపీ మీద ‘ఐకాన్’ అని ఉంది. ఇదేదో యాదృచ్ఛికంగా పెట్టుకున్న టోపీలా అనిపించడం లేదు. ‘ఐకాన్’ సినిమాకు ఇప్పట్నుంచో ప్రచారం చేస్తున్నట్లుగా అనిపిస్తోంది. బన్నీ తన ఔట్ ఫిట్ విషయంలో ఎప్పుడూ చాలా కాన్షియస్‌గా ఉంటాడు. కెమెరా కన్ను తన మీద పడే అవకాశం ఉన్న ఎప్పుడూ మంచి మంచి బ్రాండ్లు ధరిస్తుంటాడు. అతను ఏదైనా ఆడియో వేడుకకో, ప్రి రిలీజ్ ఈవెంట్‌లో వచ్చిన ప్రతిసారీ డ్రెస్సింగ్ చర్చనీయాంశం అవుతుంటుంది. ఇంటర్నేషనల్ లెవెల్లో బాగా పాపులర్ అయిన ట్రెండీ బ్రాండ్స్ వేయడం బన్నీకి అలవాటు. ఆ రకంగా జనాల దృష్టిని బాగా ఆకర్షిస్తుంటాడు. తనకున్న ‘స్లైలిష్ స్టార్’ ట్యాగ్‌ను జస్టిఫై చేస్తుంటాడు. ఈ నేపథ్యంలో ‘ఐకాన్’ టోపీ వాడటం మీదా జనాలు ఆసక్తికరంగా చర్చించుకుంటున్నారు. ఐతే ఎప్పుడో చేసే సినిమాకు ఇప్పట్నుంచే ప్రచారం ఏంటి అనే కామెంట్లు కూడా పడుతున్నాయనుకోండి.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English