కమల్ రెడీ.. ఇప్పుడుంటుంది మజా

కమల్ రెడీ.. ఇప్పుడుంటుంది మజా

తమిళనాట ఆసక్తికర రాజకీయ సమరానికి రంగం సిద్ధమైంది. పార్టీ పెట్టి ఏడాది అవుతున్నా.. పెద్దగా యాక్టివిటీస్ ఏమీ లేకుండా ఉన్న కమల్ లోక్ సభ ఎన్నికల సమరానికి సిద్ధమవుతున్నట్లు సంకేతాలు కనిపిస్తున్నాయి. కమల్‌తో పాటే రాజకీయ అరంగేట్రానికి సిద్ధమైన రజనీకాంత్.. తాను రాజకీయాల్లోకి వస్తున్నట్లు ప్రకటించాడే తప్ప పార్టీ గురించి వెల్లడించలేదు.

రాబోయే లోక్ సభ ఎన్నికల్లో తన పార్టీ పోటీ చేయదని తేల్చేశాడు. ఈ ఎన్నికలతో పాటు తమిళనాట 21 అసెంబ్లీ స్థానాలకు ఉప ఎన్నికలు కూడా జరగనుండగా.. వాటికి కూడా తన పార్టీ దూరమని రజనీ ప్రకటించాడు. తాను ఏ పార్టీకి మద్దతు కూడా ఇవ్వబోనని చెప్పేశాడు. ఐతే కమల్ కూడా అదే బాటలో నడుస్తాడేమో అనుకుంటే.. ఆయన మాత్రం ఎన్నికల పోరుకు సై అంటున్నాడు. రజనీ నేరుగా వచ్చే ఏడాది అసెంబ్లీ ఎన్నికల్లో దూకుదామని అనుకుంటుంటే కమల్ మాత్రం ఇప్పుడే ఒక రాయి వేయాలనుకుంటున్నాడు.

కమల్ ఆలోచనను అందరూ స్వాగతిస్తున్నారు. పార్టీ పెట్టిన తర్వాత ఏదైనా ఎన్నికలు వచ్చినపుడు సైలెంటుగా ఉంటే జనాలకు వేరే సంకేతాలు వెళ్తాయి. ఫలితం గురించి ఆలోచించకుండా పోటీ పడటం, వీలైనంత మేర సత్తా చాటుకోవడమే ఉత్తమం. రజనీతో పోలిస్తే వ్యక్తిత్వ పరంగా ఎప్పుడూ కమల్ కొంచెం దూకుడుగానే ఉంటాడు. అదే వైఖరి ఇప్పుడు అనుసరించబోతున్నాడు. ప్రస్తుతం ఎన్నికలు అధికార అన్నాడీఎంకే, ప్రతిపక్ష డీఎంకే మధ్య కేంద్రీకృతం అయి ఉన్నాయి. మిగతా పార్టీలు చెరోవైపు మద్దతుగా నిలుస్తున్నాయి తప్పితే.. పోటీకి వెళ్లట్లేదు.

ఐతే కమల్ రాకతో పోరు త్రిముఖంగా మారనుంది. మరి లోక నాయకుడు ఏమేరకు సత్తా చూపిస్తాడన్నది ఆసక్తికరం. కమల్ పార్టీ తరఫున అభ్యర్థులు నిలిస్తే రజనీకాంత్ పరోక్షంగా మద్దతు ప్రకటించవచ్చని తెలుస్తోంది. తన కొత్త సినిమా ‘భారతీయుడు-2’ను పక్కన పెట్టి కమల్ గట్టిగానే పోరాడేందుకు రంగం సిద్ధం చేసుకుంటున్నాడు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English