తెలుగువాడైన త‌మిళ స్టార్  హీరో విశాల్ పెళ్లి గురించి చాలా ఏళ్లుగా చ‌ర్చ న‌డుస్తోంది. త‌మిళ సీనియ‌ర్ న‌టుడు శ‌ర‌త్ కుమార్ త‌న‌యురాలు వ‌ర‌ల‌క్ష్మితో అత‌ను ప్రేమ‌లో ఉన్నాడ‌ని, వాళ్లిద్ద‌రూ పెళ్లి చేసుకుంటార‌ని చాలా ఏళ్లు ప్ర‌చారం జ‌రిగింది. ఐతే వాళ్ల మ‌ధ్య ప్రేమాయ‌ణం న‌డిచిందో లేదో తెలియ‌దు కానీ.. విశాల్ మాత్రం ఇప్పుడు వేరే అమ్మాయిని పెళ్లి చేసుకోబోతున్న‌ట్లు ప్ర‌క‌టించి అంద‌రికీ షాకిచ్చాడు.

'అర్జున్ రెడ్డి' సినిమాలో ఒక పాత్ర చేసిన అనీశాతో అత‌ను ప్ర‌స్తుతం రిలేష‌న్ షిప్‌లో ఉన్నాడు. త్వ‌ర‌లోనే వీరి పెళ్లి జ‌ర‌గ‌నుంది. మ‌రి వీరి మ‌ధ్య పరిచ‌యం ఎలా జ‌రిగింది.. ఎలా ప్రేమ‌లో ప‌డ్డారు.. పెళ్లి సంగ‌తేంటి.. ఈ విశేషాల‌న్నింటినీ ఒక ఇంట‌ర్వ్యూలో విశాల్ పంచుకున్నాడు. అందులో అత‌నేమ‌న్నాడంటే..

నేను అనీశాను ఓ సినిమా పనిలో భాగంగా కలిశాను. ఆ పరిచయం పెళ్లికి దారి తీస్తుందనుకోలేదు. వీధి శునకాలపై ఓ సినిమాకు నేను దర్శకత్వం వహించబోతున్నాను. ఈ సినిమాకు సంబంధించిన స్క్రిప్ట్ అనీశాకు చదివి వినిపించాను. ఫీడ్‌బ్యాక్‌ ఇవ్వాలని అడిగాను. ఈ సినిమా కోసం పనిచేస్తున్న క్రియేటివ్‌ బృందంలో అనీశా ఒకరు. ఈ సినిమాకు సంబంధించిన చ‌ర్చ‌ల్లో ఇద్ద‌రి మ‌ధ్య చ‌నువు పెరిగింది. ప్రేమ‌లో ప‌డ్డాం. నేనే ముందు తనకు ప్రపోజ్‌ చేశాను. ఒక్కమాటలో చెప్పాలంటే అనీశాను దేవుడే నా కోసం పంపాడు అని విశాల్ అన్నాడు.

అనీశా జాతీయ స్థాయి బాస్కెట్‌ బాల్‌ క్రీడాకారిణి అని.. సోషల్‌ వర్కర్‌ కూడా అని విశాల్ తెలిపాడు. ఆమె పెళ్లయ్యాక సినిమాలు మానేస్తుందని తాను చెప్పనని.. తనకు ఏది నచ్చితే అది చేస్తుందని అత‌న‌న్నాడు. అనీశాలో ఎవ్వరికీ తెలీని ఓ కళ కూడా ఉందని.. ఆమె ఓ పులికి శిక్షణ ఇచ్చి నిమిషాల్లో నిద్రపుచ్చగలదని.. త‌ను ఓ పులిని నిద్రపుచ్చుతున్న వీడియోను చూసి నేను ఆశ్చ‌ర్యపోయానంటూ త‌న ఫియాన్సీ గురించి అతిశ‌యంగా చెప్పాడు విశాల్.