నిహారిక పెళ్లిపై నాగ‌బాబు ఓపెన‌య్యాడు

నిహారిక పెళ్లిపై నాగ‌బాబు ఓపెన‌య్యాడు

మెగా బ్ర‌ద‌ర్ నాగ‌బాబు త‌న‌యురాలు నిహారిక తెరంగేట్రం చేసినప్ప‌టి నుంచి ఆమె పెళ్లి గురించి ఊహాగానాలు వ‌స్తున్నాయి. మెగా సోద‌రుల మేన‌ల్లుడు సాయిధ‌ర‌మ్ తేజ్‌తో నిహారిక పెళ్లి అంటూ ఒక టైంలో ప్ర‌చారం జ‌రిగింది. కానీ మెగా ఫ్యామిలీలో అలాంటి ఉద్దేశాలే లేవ‌ని త‌ర్వాత స్ప‌ష్ట‌మైంది. త‌ర్వాత ఒక ద‌శ‌లో ప్ర‌భాస్‌తో నిహారిక పెళ్ల‌న్నారు. ఐతే ఇది కూడా గాలి క‌బురే అని తేలింది.

ఐతే ఇప్పుడు స్వ‌యంగా నాగ‌బాబు త‌న కూతురి పెళ్లి గురించి మాట్లాడాడు. ఆమెకు సంబంధాలు చూస్తున్న‌ట్లు చెప్పాడు. త‌న‌కు కాబోయే అల్లుడు కాపు కులానికి చెందిన వాడైతే మంచిదే అని.. అలా కాకుండా వేరే కులానికి చెందిన మంచి వ్య‌క్తి క‌నిపించినా నిహారిక పెళ్లి జ‌రిపించ‌డానికి సిద్ధ‌మ‌ని నాగ‌బాబు ప్ర‌క‌టించాడు. ఓ వీడియో ఇంట‌ర్వ్యూలో భాగంగా కూతురి పెళ్లి గురించి నాగ‌బాబు ఆస‌క్తిక‌ర వ్యాఖ్య‌లు చేశాడు.

ఆడ పిల్లల్ని సినిమాల్లోకి పంపాలా వ‌ద్దా అని త‌మ కుటుంబంలో చ‌ర్చ జ‌రిగింద‌ని.. ఆ స‌మ‌యంలో నిహారిక‌ గట్టిగా తాను సినిమాల్లో చేస్తానని చెప్ప‌డంతో స‌రే అన్నాన‌ని నాగ‌బాబు చెప్పాడు. ఐతే ఆమె సినిమాల్లోకి వ‌చ్చే ముందే.. రెండు మూడేళ్లలో పెళ్లి చేస్తానని నిహారిక‌తో చెప్పిన‌ట్లు నాగ‌బాబు వెల్ల‌డించాడు. ఆ త‌ర్వాత సినిమాలు కాకుంటే వెబ్ సిరీస్ చేసుకోవ‌చ్చ‌ని కూడా అన్న‌ట్లు తెలిపాడు. ఆ మాట‌కు స‌రే అని నిహారిక సినిమాల్లో అడుగుపెట్టింద‌న్నాడు. ప్ర‌స్తుతం తాము నిహారిక కోసం బయటి సంబంధాలే చూస్తున్నామ‌ని.. త్వరలో ఆమెకు పెళ్లి చేస్తామ‌ని.. పెళ్లి విష‌యంలో ప్రెజ‌ర్ చేయ‌కుండా నిహారికకు 2018 వరకూ టైమ్ ఇచ్చిన‌ట్లు నాగ‌బాబు చెప్పాడు.

నిహారిక‌కు కాబోయే వ‌రుడు మంచి వ్యక్తి.. పద్ధతైన వ్యక్తి అయి ఉండాల‌ని.. త‌న‌కు అంత క్యాస్ట్ ఫీలింగ్ అయితే ఉండదని.. కానీ త‌న కాపు కులంతో పాటు అన్ని కులాలనూ గౌరవిస్తానని  నాగ‌బాబు అన్నాడు. నిహారిక‌కు కాబోయే వ‌రుడి విష‌యంలో త‌న‌కు కులంతో సంబంధం లేదని. అత‌ను, త‌న త‌ల్లిదండ్రులు మంచి వాళ్ల‌యితే చాల‌ని.. త‌మ కాపు కులంలో మంచి అబ్బాయి దొరికితే మంచిదే అని. దొరక్కపోయినా వేరే కులంలో తన కాళ్లపై తాను నిలబడిన మంచి వ్య‌క్తి దొరికితే పెళ్లి చేసేందుకు సిద్ధ‌మ‌ని నాగ‌బాబు అన్నాడు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English