మెగాస్టార్ టైటిల్‌ కలిసొచ్చేనా!

ఇటు హీరోగానూ అటు విలన్‌గానూ కూడా రాణించేందుకు రెడీ అయ్యాడు కార్తికేయ. విలన్‌గా తనలోని పర్‌‌ఫార్మర్‌‌కి ఫుల్ మార్కులు వేయించుకున్నాడు. హీరోగా మాత్రం సరైన సక్సెస్ ఖాతాలో పడక సతమతమవుతున్నాడు. ‘రాజా విక్రమార్క’తో తన ఆశ నెరవేరుతుందనే నమ్మకంతో ఉన్నాడు.

వీవీ వినాయక్ శిష్యుడైన శ్రీ సరిపల్లి డైరెక్షన్‌లో 88 రామారెడ్డి నిర్మిస్తున్న ఈ మూవీలో ఎన్‌ఐఏ ఏజెంట్‌గా నటిస్తున్నాడు కార్తికేయ. సీనియర్ కన్నడ స్టార్‌‌ రవిచంద్రన్ మనవరాలు తాన్యా హీరోయిన్‌గా నటిస్తోంది. సుధాకర్ కోమాకుల ఓ కీలక పాత్రలో కనిపించబోతున్నాడు. ఈ చిత్రాన్ని నవంబర్‌‌ 12న రిలీజ్ చేయడానికి ముహూర్తం పెట్టినట్టు తాజాగా ప్రకటించారు మేకర్స్.

టైటిల్‌ అనౌన్స్‌మెంట్‌తోనే అందరి దృష్టినీ తన సినిమావైపు తిప్పుకున్నాడు కార్తికేయ. అప్పట్లో చిరంజీవి హీరోగా నటించిన ‘రాజా విక్రమార్క’ భారీ విజయం సాధించింది. మెగాస్టార్‌‌ మీద అభిమానంతో అదే టైటిల్‌ను ఏరి కోరి ఈ సినిమాకి పెట్టారు. ఆమధ్య రిలీజైన టీజర్‌‌ ఇంటరెస్టింగ్‌గా ఉండటంతో మూవీపై పాజిటివ్ బజ్ నెలకొంది. దానికి తోడు మెగాస్టార్ టైటిల్ సెంటిమెంట్ కూడా వర్కవుటయ్యి కార్తికేయకి కలిసొస్తుందేమో చూడాలి మరి.