ప్రస్తుతం టాలీవుడ్లో మోస్ట్ వాంటెడ్ హీరోల్లో విజయ్ దేవరకొండ ఒకడు. ‘అర్జున్ రెడ్డి’ సినిమాలో అతడి పెర్ఫామెన్స్ చూశాక పెద్ద పెద్ద దర్శకులకు సైతం ఇతడితో ఒక సినిమా చేయాలి అనే ఫీలింగ్ కలిగింది. కొరటాల శివ లాంటి స్టార్ డైరెక్టర్ కూడా ఇదే కోరిక వ్యక్తం చేశాడు. ఐతే విజయ్ ఇంకా పెద్ద దర్శకుల చేతుల్లోకి వెళ్లలేదు. తన ఆలోచనలతో మ్యాచ్ అయ్యే యంగ్ అండ్ అప్ కమింగ్ డైరెక్టర్లతోనే సాగిపోతున్నాడు. ఆల్రెడీ కమిటైన సినిమాలతో రెండేళ్లకు పైగా డైరీ నిండిపోవడంతో ఎవరికీ కొత్తగా కమిట్మెంట్ ఇచ్చే పరిస్థితుల్లో లేడు. ఇలాంటి తరుణంలోనే విజయ్ దేవరకొండను ఒక స్క్రిప్టుతో కలిశాడట స్టార్ డైరెక్టర్ పూరి జగన్నాథ్. విజయ్ కొత్త సినిమా ‘డియర్ కామ్రేడ్’ చిత్రీకరణ జరుగుతున్న కాకినాడకు పూరీనే స్వయంగా వెళ్లినట్లు సమాచారం.

ఐతే కారణాలేంటన్నది తెలియలేదు కానీ.. పూరితో సినిమా చేయడానికి విజయ్ ఒప్పుకోలేదని తెలిసింది. అతను కాదన్నాక అదే కథను రామ్‌కు చెప్పి ఒప్పించాడట పూరి. ఐతే విజయ్ కథ నచ్చక ఈ సినిమా చేయలేదా.. లేక డేట్లు ఖాళీ లేక ఒప్పుకోలేదా అన్నది చర్చనీయాంశంగా మారింది. కథ మరీ అంతగా నచ్చేసి ఉంటే ఎలాగోలా సర్దుబాటు చేసుకుని సినిమా చేసేవాడని అంటున్నారు. పూరి ఎలాగూ రెండు మూడు నెలల్లో సినిమా లాగించేసే రకమే కాబట్టి ఆమాత్రం అడ్జస్ట్‌మెంట్ కష్టమేమీ కాకపోయి ఉండొచ్చు. విజయ్ ఓకే అంటే పూరి కొన్నాళ్లు ఖాళీగా ఉండి అయినా సినిమా చేసేవాడు. కాబట్టి అది విజయ్‌ను అంత ఎగ్జైట్ చేసే స్క్రిప్టు కాకపోయి ఉండొచ్చు. ఐతే రామ్ మాత్రం పూరి ట్రాక్ రికార్డు పట్టించుకోకుండా ఈ సినిమాను ఓకే చేశాడు. ‘హలో గురూ ప్రేమ కోసమే’తో హిట్ కొట్టాక పూరితో జట్టు కట్టడం అంటే రామ్ రిస్క్ చేస్తున్నట్లే. మరి ఈ రిస్క్ ఎలాంటి ఫలితాన్నిస్తుందో చూడాలి.