నాని ఏం చేయ‌బోతున్నాడు?

క‌రోనా కేసులు త‌గ్గాయి. భ‌యం పోయింది. థియేట‌ర్లు పునఃప్రారంభం అయ్యాయి. 50 శాతం ఆక్యుపెన్సీతోనూ మంచి వ‌సూళ్లు వ‌చ్చాయి. త‌ర్వాత ఆక్యుపెన్సీని వంద శాతానికి పెంచారు. మంచి టాక్ తెచ్చుకున్న సినిమాకు భారీగా క‌లెక్ష‌న్లు వ‌చ్చాయి. ఇది చూసి గ‌తంలో క‌న్నా ఎక్కువ స్థాయిలో సినిమాల రిలీజ్‌కు ప్ర‌ణాళిక‌లు సిద్ధ‌మ‌య్యాయి. ఇక క‌రోనా ప్ర‌భావం సినిమాల‌పై ఏమీ ఉండ‌ద‌నే అనుకున్నారంతా.

మ‌ళ్లీ టాలీవుడ్ పూర్వ‌ఫు ఫామ్ అందుకుని అంతా సంతోషంగా ఉన్న స‌మ‌యంలో.. క‌రోనా సెకండ్ వేవ్ మ‌ళ్లీ ఇండ‌స్ట్రీని దెబ్బ కొడుతోంది. కేసులు బాగా పెరిగిపోవ‌డంతో థియేట‌ర్ల‌పై ఆంక్ష‌లు త‌ప్పేట్లు లేవు. ఇప్ప‌టికే క‌ర్ణాట‌క‌, త‌మిళ‌నాడుల్లో ఆక్యుపెన్సీని 50 శాతానికి త‌గ్గించేశారు. ఏపీ, తెలంగాణ‌ల్లోనూ ఈ దిశ‌గా అడుగులు ప‌డ‌టం లాంఛ‌న‌మే అంటున్నారు.

ఈ నేప‌థ్యంలోనే వ‌చ్చే వారం రావాల్సిన ల‌వ్ స్టోరి సినిమాను వాయిదా వేసుకుంది చిత్ర బృందం. ప్ర‌స్తుతం వ‌కీల్ సాబ్ లాంటి భారీ చిత్రం థియేట‌ర్ల‌లో ఉన్న నేప‌థ్యంలో రెండు రాష్ట్రాల ప్ర‌భుత్వాలు కొంచెం ఆగాయ‌ని.. మ‌రి కొన్ని రోజుల్లో 50 శాతం ఆక్యుపెన్సీ అమ‌లు కావ‌డం లాంఛ‌న‌మే అని అంటున్నారు. ఇదే జ‌రిగితే ఈ నెల 23న రావాల్సిన ట‌క్ జ‌గ‌దీష్ సైతం వాయిదా ప‌డ‌క త‌ప్ప‌దేమో.

ల‌వ్ స్టోరి వాయిదా నిర్ణ‌యం వెల్ల‌డి కాగానే.. నాని సినిమా విష‌యంలో ఏం చేస్తార‌నే సందేహాలు అంద‌రిలోనూ క‌లిగాయి. వ‌చ్చే వారంలో క‌రోనా ప్ర‌భావం ఎలా ఉండ‌బోతోంది.. ప్ర‌భుత్వం థియేట‌ర్ల‌పై ఆంక్ష‌లు పెడుతుందా లేదా అన్న‌దాన్ని బ‌ట్టి ట‌క్ జ‌గ‌దీష్ టీం త‌మ సినిమాను వాయిదా వేయాలా వ‌ద్దా అని నిర్ణ‌యం తీసుకునే అవ‌కాశ‌ముంది.