పవన్ సినిమాకు రాయమంటే నో చెప్పాడు

పవన్ సినిమాకు రాయమంటే నో చెప్పాడు

పవర్ స్టార్ పవన్ కళ్యాణ్ సినిమాకు మాటలు రాయమంటే ఏ రచయిత అయినా నో చెబుతాడా? ఐతే యాక్టర్ టర్న్డ్ రైటర్ హర్షవర్ధన్ మాత్రం ఆ అవకాశాన్ని వద్దనుకున్నాడు. అందుకు కారణం అతడి దర్శకత్వ కలలే. ఇష్క్.. గుండెజారి గల్లంతయ్యిందే.. మనం లాంటి సినిమాలతో రచయితగా మంచి పేరు సంపాదించిన హర్షవర్ధన్.. మెగా ఫోన్ పట్టాలని రెండేళ్లుగా ప్రయత్నిస్తున్నాడు. అతడి ప్రయత్నం ఎట్టకేలకు ఈ ఏడాదే ఫలించింది. కొన్ని రోజుల కిందటే దర్శకుడిగా హర్షవర్ధన్ తొలి సినిమా సెట్స్ మీదికి వెళ్లింది. ఐతే ఈ సినిమా సన్నాహాల్లో ఉండగానే.. హర్షకు పవన్ కళ్యాణ్ సినిమాకు రాసే అవకాశం వచ్చిందట.

‘కాటమరాయుడు’ తర్వాత పవన్ తమిళ దర్శకుడు టీఎన్ నీశన్ దర్శకత్వంలో ఓ సినిమా చేయడానికి అంగీకరించిన సంగతి తెలిసిందే. తమిళ హిట్ ‘వేదాలం’కు రీమేక్‌గా తెరకెక్కనున్న ఈ చిత్రానికి ఆల్రెడీ ప్రారంభోత్సవం కూడా జరిపారు. హర్షవర్ధన్ టాలెంటు తెలుసుకుని రత్నం అతడినే ఈ చిత్రానికి మాటలు రాయమన్నాడట. కానీ దీని మీద పడితే.. తన దర్శకత్వ కల వాయిదా పడిపోతుందని భావించి హర్ష ఆ సినిమాకు నో చెప్పాడట. ఐతే ఆ విషయంలో రిగ్రెట్స్ ఏమీ లేవని.. తన చిరకాల వాంఛ నెరవేర్చుకునే క్రమంలోనే పవన్ సినిమాకు నో చెప్పానని అంటున్నాడు హర్షవర్ధన్.

స్వయంగా తనే ఓ కీలక పాత్రలో నటిస్తూ హర్షవర్ధన్ దర్శకత్వం వహిస్తున్న ఈ చిత్రం ఒక డిఫరెంట్ జానర్లో సాగుతుందట. ఇందులో శ్రీముఖితో పాటు తమిళ నటుడు కిషోర్ ముఖ్య పాత్రలు పోషిస్తున్నారు. ఇది సెట్స్ మీద ఉండగానే దర్శకుడిగా తన రెండో సినిమాలో సుధీర్ బాబు కథానాయకుడిగా నటిస్తాడని హర్షవర్ధన్ వెల్లడించడం విశేషం.