తమన్ అదరగొట్టాడు కానీ…


ప్రస్తుతం సౌత్ ఇండియాలోనే టాప్ మ్యూజిక్ డైరెక్టర్లలో తమన్ ఒకడు. తెలుగులో అయితే అతడికి ఎదురే లేదు. ఇక్కడ దేవిశ్రీ ప్రసాద్‌ను వెనక్కి నెట్టి నంబర్ వన్ స్థానాన్ని చేజిక్కించుకుని చాలా కాలమైంది. ‘వకీల్ సాబ్’తో పాటు పవన్ కళ్యాణ్ నటించనున్న మరో సినిమా (అయ్యప్పనుం కోషీయుం రీమేక్).. అలాగే మహేష్ బాబు కొత్త చిత్రం ‘సర్కారు వారి పాట’.. ఇలాంటి భారీ చిత్రాలు తమన్ ఖాతాలో ఉన్నాయి. ప్రస్తుతానికి వీటిలో అందరి దృష్టినీ ఆకర్షిస్తున్నది ‘వకీల్ సాబ్’ అని ప్రత్యేకంగా చెప్పాల్సిన పని లేదు.

పవన్ కళ్యాణ్ రీఎంట్రీ మూవీ కావడంతో దీనిపై భారీ అంచనాలే ఉన్నాయి. ఇది మహిళల నేపథ్యంలో సాగే సినిమా కదా.. తమన్ ప్రత్యేకత ఏముంటుందిలే అనుకున్నారు కానీ.. ఇందులో హీరోయిజానికి, ఎలివేషన్ సీన్లకు లోటేమీ ఉండదని ఇప్పటిదాకా వచ్చిన ప్రోమోలు రుజువు చేశాయి. ముఖ్యంగా లేటెస్టుగా వచ్చిన టీజర్ అయితే పవన్ అభిమానులకు గూస్ బంప్స్ ఇచ్చేసింది.

తమన్ అదిరిపోయే బ్యాగ్రౌండ్ స్కోర్‌తో ఈ టీజర్‌ను ఎలివేట్ చేశాడు. పవన్ తనదైన స్క్రీన్ ప్రెజెన్స్‌తో ఆకట్టుకుంటే.. దర్శకుడు వేణు శ్రీరామ్ అభిమానులకు గూస్ బంప్స్ ఇచ్చేలా పవర్ స్టార్‌ను ప్రెజెంట్ చేశాడు. తమన్ తన వంతుగా ఆర్ఆర్‌తో టీజర్‌ను ఎలివేట్ చేశాడు. ఐతే తమన్ ఎంత పనితనం చూపించినా.. కాపీ కోణంలో చూడటం జనాలకు అలవాటు. గతంలో అతడి ట్యూన్స్, బ్యాగ్రౌండ్ స్కోర్‌ల విషయంలో మరకలు పడటమే అందుక్కారణం.

‘వకీల్ సాబ్’ టీజర్‌ స్కోర్‌ను సైతం ఇప్పుడు ‘మాస్టర్’ టీజర్‌తో పోల్చి చూస్తున్నారు. అనిరుధ్ ‘మాస్టర్’ టీజర్‌కు ఇచ్చిన స్కోర్‌ను తమన్ కాపీ కొట్టేశాడు అనలేం కానీ.. ఆ స్టయిల్‌ను ఫాలో అయినట్లు అనిపిస్తుంది రెండు టీజర్లను మార్చి మార్చి చూస్తే. ఇక చివర్లో వచ్చే విజిల్ సౌండ్ కూడా కొన్ని సినిమాల్లో విన్నదే. పవన్ టీజర్లో బ్యాగ్రౌండ్ స్కోర్ పరంగా ఎంత ఊపు ఉండాలో అంతా ఉన్నప్పటికీ.. తమన్ కొత్తగా చేసిందేమీ లేదని.. వేరే సినిమాల ఆర్ఆర్‌ స్టైల్‌ను ఫాలో అయ్యాడనే విమర్శలు మాత్రం తప్పట్లేదు.