ఈ రెండు ఆప్ష‌న్ల‌తో కేసీఆర్ జాతీయ రాజ‌కీయాల్లోకి ఎంట్రీ

ఈ రెండు ఆప్ష‌న్ల‌తో కేసీఆర్ జాతీయ రాజ‌కీయాల్లోకి ఎంట్రీ

గులాబీ ద‌ళ‌ప‌తి కేసీఆర్ అంచ‌నాల‌ను నిజం చేస్తూ..అసెంబ్లీని ర‌ద్దు చేసిన సంగ‌తి తెలిసిందే. తొలి ముఖ్య‌మంత్రిగా రికార్డు సృష్టించిన కేసీఆర్ తొలి అప‌ద్ధ‌ర్మ ముఖ్య‌మంత్రిగా కూడా ప్ర‌త్యేక‌త‌ను సాధించుకునే ధైర్యం చేశారు.

ఈ సంద‌ర్భంగానే తాను ఎందుకు రాజీనామా చేశాను...ఎలా నెగ్గుతాం అనే అంశాల‌ను ఆయ‌న స‌వివ‌రంగానే తెలియ‌జెప్పారు. దీనికి తోడుగా...త‌న త‌ర్వాతి టార్గెట్ అయిన జాతీయ రాజ‌కీయాల గురించి వెల్ల‌డించారు.

ఫెడ‌ర‌ల్ ఫ్రంట్ పేరుతో గ‌తంలో తాను ప్ర‌య‌త్నించింది విఫ‌లం కాలేద‌ని..త్వ‌ర‌లో తెర‌మీద‌కు రానుంద‌ని కూడా కారు పార్టీ నాయ‌కుడు కన్ఫ‌ర్మ్ చేసేశారు. ఈ నేప‌థ్యంలో...జాతీయ రాజ‌కీయాల్లో కేసీఆర్ ఎలా ఎంట్రీ ఇవ్వ‌నున్నారు? ఆయ‌న ఎలాంటి పాత్ర పోషించ‌నున్నార‌నేది చాలా మందికి స‌హ‌జంగానే ఆస‌క్తిని క‌లిగించే అంశం.

రాజ‌కీయ విశ్లేష‌కులు, టీఆర్ఎస్ అధినేత కేసీఆర్ మ‌నోగ‌తం తెలిసిన వారి ప్ర‌కారం....కేంద్రంలో బ‌లంగా ఉన్న రెండు పార్టీలైన బీజేపీ, కాంగ్రెస్‌ల విష‌యంలో కేసీఆర్‌కు స్ప‌ష్ట‌త ఉందంటున్నారు. బీజేపీ విషయంలో వ్యతిరేకత లేకున్నా కాంగ్రెస్‌పార్టీపై ఆయన ఆగ్రహంగా ఉన్నారు.

తాజా విలేక‌రుల స‌మావేశంలో  తెలంగాణకు బద్ధశత్రువు కాంగ్రెస్సేనని, అందుకు నెహ్రూ, ఇందిరాగాంధీ కూడా కారకులని విమ‌ర్శించారు. రాహుల్‌గాంధీని బఫూన్‌తో పోల్చిన కేసీఆర్‌ కేంద్రంలో కాంగ్రెస్‌పార్టీతో కలిసి వెళ్లేందుకు సిద్ధంగా లేరని స్ప‌ష్ట‌మ‌వుతోందంటున్నారు. కాంగ్రెస్‌పార్టీకి ఏ రాష్ట్రంలోనూ 20 సీట్లు వచ్చే అవకాశం లేదనీ, ఆ పార్టీ నేతలు గట్టిగా చెప్పడానికి సాహసం చేయలేకపోతున్నారని ఎద్దేవా చేశారు.

కాంగ్రెస్‌పార్టీ అధికారంలో ఉన్న రాష్ట్రాలు కూడా తక్కువే. దీంతో తెలంగాణలోనూ కాంగ్రెస్‌పార్టీని లేకుండా చేసేందుకే ఆ పార్టీనే టార్గెట్‌ చేశారు. కేంద్రంలో కాంగ్రెస్‌పార్టీ ప్రభుత్వం ఏర్పడటం అసంభవం అన్నది ఆయన మాటలు చెబుతున్నాయి. ఇక మిగిలింది బీజేపీ.

బీజేపీతో దోస్తీ విష‌యంలో కూడా కేసీఆర్ తొంద‌ర‌ప‌డ‌టం లేద‌ని తెలుస్తోంది. 2019 ఎన్నికల్లో అన్ని పార్టీల కంటే బీజేపీకి ఎక్కువ సీట్లొస్తే ఆ పార్టీకే కేసీఆర్‌ మద్దతు ఇవ్వడం ఖాయమని తెలుస్తోంది. చాలా రాష్ట్రాల్లో బీజేపీ అధికారంలో ఉండటంతో ఇప్పుడే ఆ పార్టీపై దాడి చేయకూడదన్న అభిప్రాయంతోనే కేసీఆర్‌ ఉన్నట్టు తెలుస్తోంది. నరేంద్రమోడీ, అమిత్‌షా కేసీఆర్‌పై ఎక్కడలేని ప్రేమ చూపించడానికి ఇదే కారణమని తెలుస్తోంది. ఆదుకునే మిత్రుడ్ని దూరం చేసుకోవద్దన్న భావనలో గట్టిగానే ప్రయత్నిస్తున్నారు.

అయితే జాతీయ పార్టీల కంటే మించి దేశంలోని ప్రాంతీయ పార్టీలకు కలిసి ఎక్కువ లోక్‌సభ సీట్లు వస్తే ప్రజల కూటమిగా ఏర్పడి కేంద్రంలో ప్రభుత్వాన్ని ఏర్పాటు చేయాలనేది తన అభిలాషని చెబుతున్నారు. ఏ విధంగా చూసినా 2019 ఎన్నికల్లో జాతీయ రాజకీయాల్లో కీలకపాత్ర పోషించాలన్నది కేసీఆర్‌ ఆలోచనగా ఉందని, సంద‌ర్భాన్ని బ‌ట్టి ప్రాంతీయ పార్టీల కూట‌మి లేదా బీజేపీకి బ‌య‌ట‌నుంచి మ‌ద్ద‌తు ఇచ్చి త‌న ప్ర‌యోజ‌నాల‌ను కాపాడుకోవ‌డం అనేది ఆయ‌న ఎజెండా అని విశ్లేషిస్తున్నారు.

 

రాజకీయ వార్తలు

 

సినిమా వార్తలు