ఇండియా టెకీల‌కు అమెరికా కంపెనీ గుడ్ న్యూస్‌

ఇండియా టెకీల‌కు అమెరికా కంపెనీ గుడ్ న్యూస్‌

ఇటీవ‌లి కాలంలో టెకీల‌కు మిశ్ర‌మ వార్త‌లు వినిపిస్తుండ‌టం...ప్ర‌ధానంగా అమెరికా నుంచి దుర్వార‌త్లు మాత్ర‌మే వినాల్సి వ‌స్తున్న నేప‌థ్యంలో తాజాగా ఓ తీపిక‌బురు అమెరికా కంపెనీ నుంచి వినిపించింది. సాఫ్ట్‌వేర్‌ ఉద్యోగాలు ఒకింత ఒడిదుడుకుల‌కు లోనవుతున్న ప్ర‌స్తుత స‌మ‌యంలో...ఏకంగా వెయ్యి ఉద్యోగాల భ‌ర్తీకి ఆ కంపెనీ సిద్ధ‌మైంది. స‌ద‌రు కంపెనీయే ప్ర‌పంచ ప్ర‌ఖ్యాత రిటైల్ దిగ్గ‌జం వాల్‌మార్ట్‌. భారతదేశంలో తన వ్యాపార విస్తరణకు ప్రణాళికలు రచిస్తున్న రీటైల్‌ దిగ్గజం వాల్‌మార్ట్  త‌న‌ టెక్నాలజీ ఆపరేషన్స్‌ విస్తరణకోసం దేశీయంగా భారీగా టెకీలను నియమించుకునేందుకు చర్యలు చేపట్టింది. దేశీయంగా దాదాపు వెయ్యిమంది టెకీలను నియమించుకోనుంది. ఈ ప‌రిణామం దేశీయ టెకీల‌కు  తీపిక‌బురుగా మారింది.

ఇటీవ‌లే సంచ‌ల‌న ప‌రిణామంతో అమెరికాలో అతిపెద్ద రిటైలర్ అయిన వాల్‌మార్ట్ వార్త‌ల్లో నిలిచిన సంగ‌తి తెలిసిందే. భారతీయ ఈ-కామర్స్ దిగ్గజ సంస్థ ఫ్లిప్‌కార్ట్ ను.. వాల్ మార్ట్ కైవసం చేసుకుంది. ఈ డీల్ విలువ అక్షరాల లక్ష కోట్ల రూపాయలు. ఫ్లిప్ కార్ట్ లో 20శాతం వాటా ఉన్న జపాన్ బ్యాకింగ్ దిగ్గజం అయిన సాఫ్ట్ బ్యాంక్ కూడా తన 20శాతం వాటాను పూర్తిగా అమ్మేసింది. ఈ విషయాన్ని సాఫ్ట్ బ్యాంక్ సీఈవో మసయోషి సన్ వెల్లడించారు. ఫ్లిప్ కార్ట్ లో 60శాతం వాటా వాల్ మార్ట్, 15శాతం వాటాను గూగుల్ మాతృసంస్థ అయిన ఆల్ఫాబెట్ కొనుగోలు చేసింది. మెజార్టీ వాటా వాల్ మార్ట్ వశం అయింది.

ఇలా భారీ విస్త‌ర‌ణ‌తో దేశం చూపును త‌న‌వైపు తిప్పుకొన్న వాల్ మార్ట్ త‌న వ్యాపార కార్య‌క‌లాపాల్లో దూకుడు పెంచింది. ఈ-కామర్స్ రంగ దిగ్గజం అమెజాన్‌కు దీటుగా నిలిచేందుకు కొత్త టార్గెట్ నిర్ణయించుకొని...ఆప‌రేష‌న్స్‌కు వెయ్యిమంది టెకీల‌ను నియ‌మించుకునేలా డిసైడ‌యింది. ది ఎకనామిక్ టైమ్స్ ప్రకారం టెకీలకు 6 లక్షలనుంచి 22 లక్షల రూపాయల దాకా వేతనాలను ఆఫర్‌ చేయనుంది. గురగావ్‌, బెంగళూరు ద్వారా సేవలను అందిస్తున్న ఈ సంస్థలో ప్రస్తుతం 1800 మంది ఉద్యోగులున్నారు. అమెరికా వెలుపల వాల్‌మార్ట్‌ ల్యాబ్స్‌ పేరుతో ఇండియాలో సంవత్సరానికి సుమారు 10 బిలియన్ డాలర్ల ఆదాయంతో వ్యాపారాన్ని నిర్వహిస్తోంది. ఉత్పత్తి ఆధారితంగా సంస్థగా ఉండేందుకు ప్రధానంగా భారతీయ ఉత్పత్తులకు  ప్రోత్సాహమిచ్చేలా కొత్త ప్రాజెక్టులు చేపట్టామని వాల్‌మార్ట్‌ ముఖ్య సమాచార అధికారి క్లే జాన్సన్ తెలిపారు.