హెచ్-1బీ, హెచ్-4లలో మార్పుల్లేవ్!

హెచ్-1బీ, హెచ్-4లలో మార్పుల్లేవ్!

భార‌తీయుల‌కు గొప్ప తీపిక‌బురు. అమెరికాలో ఉద్యోగాలు చేయడానికి భారతీయ నిపుణులు అత్యధికంగా ఉపయోగించుకునే హెచ్-1బీ వీసా నిబంధనల్లో పెద్దగా మార్పులు ఉండబోవని ఢిల్లీలోని అమెరికా మిషన్ డిప్యూటీ చీఫ్ కార్ల్‌సన్ వెల్లడించారు. అదేవిధంగా హెచ్-1బీ వీసాదారుల జీవిత భాగస్వాములకు అందజేసే హెచ్-4 వీసా నిబంధనల్లో కూడా మార్పులు ఉండవని పేర్కొన్నారు. హెచ్-4 వీసాలు కలిగిన వారికి వర్క్ పర్మిట్లను రద్దు చేయాలని ట్రంప్ ప్రభుత్వం భావిస్తోందని వస్తున్న ఊహాగానాలకు కార్ల్‌సన్ తెరదించారు. అలాంటి నిర్ణ‌య‌మేది ప్ర‌స్తుతం తీసుకోలేద‌ని ఆమె స్ప‌ష్టం చేసి ఉత్కంఠ‌కు తెర‌దించారు.

హెచ్-1బీ వీసాదారుల జీవిత భాగస్వాములకు ఇచ్చే హెచ్-4 వీసాదారులకు వర్క్ పర్మిట్లను కల్పిస్తూ ఒబామా ప్రభుత్వం నిర్ణయం తీసుకుంది. కాగా దానికి ముగింపు పలుకాలని ట్రంప్ ప్రభుత్వం ప్రయత్నిస్తున్నట్టు ఇటీవల కథనాలు వెలువడ్డాయి. ఒకవేళ అటువంటి నిర్ణయం ప్రకటిస్తే హెచ్-4 వీసా కలిగిన 70 వేల మంది భారతీయులు తీవ్ర ఇబ్బందులు ఎదుర్కోవాల్సి వస్తుంది. కాగా భారతీయులకు నష్టం కలిగించే ఇటువంటి నిర్ణయం తీసుకోకుండా కేంద్రం అమెరికాపై ఒత్తిడి తెచ్చింది.

ఈ నేప‌థ్యంలో భారత్-అమెరికా మధ్య ఉన్నత విద్యా సంబంధాలను బలోపేతం చేసే ఉద్దేశంతో అమెరికా మిషన్ ఆధ్వర్యంలో విద్యార్థి వీసా దినోత్సవం కార్యక్రమాన్ని ఢిల్లీలో నిర్వహించారు. ఈ సందర్భంగా కార్ల్‌సన్ మాట్లాడుతూ హెచ్-1బీ వీసా కార్యక్రమంలో పెద్దగా మార్పులు ఉండబోవని అలాగే హెచ్-4లో కూడా కొత్తగా అమలు చేసేది ఏమీలేదని వెల్లడించారు. ఉద్యోగ వీసాలు జారీచేయడం, భారతీయులకు వర్క్ పర్మిట్లు ఇవ్వడం అనేది అమెరికా సార్వభౌమాధికార నిర్ణయమని స్పష్టం చేశారు.

ఇదిలాఉండ‌గా..అమెరికాకు వెళ్లే భారతీయ విద్యార్థులు ఈ దశాబ్ద కాలంలో రెట్టింపయ్యారని అమెరికా అధికారుల గ‌ణాంకాలు తెలిపాయి. పదేళ్ల‌ కింద అమెరికాకు వెళ్లే భారతీయ విద్యార్థులు 90 వేల మంది ఉండేవారని, ప్రస్తుతం 1.80 లక్షల మందికి చేరారని వివరించాయి. అమెరికాకు వెళ్లే వారిలో 56 శాతం మంది పీజీ కోర్సులు, 12 శాతం మంది అండర్‌ గ్రాడ్యుయేట్‌ కోర్సులు చదివేందుకు వెళ్తున్నారని పేర్కొన్నాయి. వారిలో 80 శాతం మంది సైన్స్‌, టెక్నాలజీ, గణితం, వృత్తివిద్య వంటి కోర్సుల్లో చేరేందుకు ఆసక్తి చూపుతున్నారు.