మ‌క్కామ‌సీదు కేసు కొట్టివేత‌...హ‌ర్ట్ అయిన అస‌ద్‌

మ‌క్కామ‌సీదు కేసు కొట్టివేత‌...హ‌ర్ట్ అయిన అస‌ద్‌

దేశ‌వ్యాప్తంగా సంచ‌ల‌నం సృష్టించిన మ‌క్కా మ‌సీదులో బాంబు పేలుళ్ల కేసులో తీర్పు వెలువ‌డింది.మక్కా మసీదు పేలుళ్ల కేసును నాంపల్లి ఎన్‌ఐఏ కోర్టు కొట్టివేసింది. ఈ కేసులో నిందితులుగా ఉన్న ఐదుగురిని నిర్దోషులుగా ప్రకటించింది. ఈ కేసులో నిందితులైన స్వామి అసీమానంద, దేవేందర్ గుప్తా, రాజేందర్ చౌదరి, లోకేశ్ శర్మ, భరత్ భాయిని భారీ బందోబస్తు మధ్య చర్లపల్లి జైలు నుంచి ఇవాళ ఉదయం నాంపల్లి కోర్టుకు తీసుకువచ్చి హాజరుపరిచారు. అనంతరం వాదనలు విన్న న్యాయమూర్తి.. ఆధారాలు లేనందున ఈ కేసును కొట్టివేస్తున్నట్లు తీర్పు వెల్లడించారు.

2007 మే 18వ తేదీన మధ్యాహ్నం 1.18 గంటలకు హైదరాబాద్‌లోని మక్కా మసీద్‌లో పేలుడు సంభవించింది. ఆ సమయంలో వందల మంది ప్రార్థనలు చేస్తున్నారు. పేలుడు తీవ్రతకు 14 మంది మరణించగా, 58 మంది తీవ్రంగా గాయపడ్డారు. హుటాహుటిన రంగంలోకి దిగిన హైదరాబాద్ పోలీసులు కేసు దర్యాప్తునకు ప్రత్యేకంగా స్పెషల్ ఇన్వెస్టిగేషన్ టీమ్(సిట్)ను ఏర్పాటు చేశారు. విధ్వంసకారులు మూడు ఐఈడీ బాంబులను అమర్చినట్టు సిట్ గుర్తించింది. వాటిలో ఒక దాన్ని టైమర్‌తో పేల్చగా, మరో రెండు పేలని బాంబులను నిర్వీర్యం చేశారు. పేలిన బాంబును బరువైన బండరాయి కింద పెట్టడంతో ప్రాణనష్టం పెద్దగా జరుగలేదని పోలీస్ అధికారులు తెలిపారు. కేసు విచారణలో పురోగతి లేకపోవడంతో 2010లో సీబీఐకి అప్పగించారు. సీబీఐ లోతైన దర్యాప్తు జరిపి దేవేందర్ గుప్తా, లోకేశ్‌శర్మను సూత్రధారులుగా గుర్తించి, మరికొందరి పేర్లు జత చేస్తూ చార్జిషీట్ దాఖలు చేసింది. 2011 మే లో జాతీయ దర్యాప్తు సంస్థ (ఎన్‌ఐఏ) కేసును విచారణకు స్వీకరించి.. 10 మంది నిందితుల పేర్లతో చార్జిషీట్ దాఖలు చేసింది.

కాగా ఈ తీర్పుపై హైద‌రాబాద్ ఎంపీ అసదుద్దీన్ ఓవైసీ తీవ్ర అసంతృప్తి వ్య‌క్తం చేశారు. కేసు తీర్పులో న్యాయం జ‌ర‌గ‌లేద‌ని ఆయ‌న అన్నారు. ఈ కేసు ద‌ర్యాప్తు విష‌యంలో నేష‌నల్ ఇన్వెస్టిగేష‌న్ ఏజెన్సీ స‌రిగా వ్య‌వ‌హ‌రించ‌లేద‌ని మండిప‌డ్డారు. ప్ర‌ధాని మోడీ ఈ కేసు విచార‌ణ విష‌యంలో త‌గు జాగ్ర‌త్త‌లు తీసుకోలేద‌ని ఆరోపించారు. బెయిల్ పిటిష‌న్ విష‌యంలో ఎన్ఐఏ వాద‌న‌లు స‌రిగా లేవ‌న్నారు. కోర్టు తీర్పులో న్యాయం లేద‌ని ఆయ‌న ఆరోపించారు. జూన్ 2014 త‌ర్వాత చాలామంది సాక్షులు ఎన్ఐఏకు స‌హ‌క‌రించ‌లేద‌ని అసుద‌ద్దీన్ దుయ్య‌బ‌ట్టారు.

 

రాజకీయ వార్తలు

 

సినిమా వార్తలు