ఎదురుగాలిని ఎదుర్కునేందుకు మోడీ ఎన్నిక‌ల‌ వ్యూహమిదే

ఎదురుగాలిని ఎదుర్కునేందుకు మోడీ ఎన్నిక‌ల‌ వ్యూహమిదే

ఇటీవ‌లి కాలంలో బీజేపీ పాలిత రాష్ర్టాలు, బీజేపీ వ్య‌తిరేక రాష్ర్టాలు అనే తేడాలేకుండా... కాషాయ పార్టీపై ఒకింత తీవ్ర‌ వ్య‌తిరేక‌త మొద‌లైంద‌ని విశ్లేష‌ణ‌లు వెలువ‌డుతున్న సంగ‌తి తెలిసిందే. మోడీ పాల‌న మ‌ధ్య‌త‌ర‌గ‌తికి మేలు చేయ‌ని విధంగా సాగ‌డం, ద‌ళితులు, మైనార్టీలు ఆందోళ‌న‌లు చేయ‌డం, ప్రాంతీయ పార్టీల ఎదురుదాడి వంటి కార‌ణాల‌తో ప్ర‌ధాన‌మంత్రి న‌రేంద్ర‌ మోడీ ప్ర‌భ మ‌స‌క‌బారుతోంద‌ని అంటున్నారు. దీనికి చెక్ పెట్టేందుకు మోడీ టీం కొత్త ఆలోచ‌న చేసింద‌ని చెప్తున్నారు. వచ్చే ఏడాది ప్రారంభమయ్యే విధంగా లోక్‌సభ, అసెంబ్లీలకు రెండు విడుతల్లో జమిలి ఎన్నికలు నిర్వహించడం సాధ్యమవుతుందా అనేదే ఆ స్కెచ్ అని స‌మాచారం.

ఢిల్లీలో జ‌రుగుతున్న చ‌ర్చ ప్ర‌కారం ఉత్తరప్రదేశ్, రాజస్థాన్, మధ్యప్రదేశ్, గుజరాత్ తదితర ఉత్తరాది రాష్ర్టాల బలంతో కేంద్రంలో పూర్తి మెజార్టీ సాధించిన బీజేపీ.. ఆ రాష్ర్టాల్లో వీస్తున్న ఎదురుగాలిని తట్టుకుని నిలబడేలా వ్యూహాలు రచిస్తోంది. 2014లో వచ్చినన్ని సీట్లు ఆ రాష్ర్టాల్లో 2019లో రాకపోతే ఎలా అన్న సందేహం బీజేపీ వ్యూహకర్తలను పీడిస్తోంది. లోక్‌సభ, రాష్ర్టాల అసెంబ్లీలకు జమిలిగా ఎన్నికలు నిర్వహించే అంశంపై బీజేపీ నేతృత్వంలోని కేంద్ర ప్రభుత్వం అత్యుత్సాహం ప్రదర్శిస్తున్నది. ఈనేపథ్యంలో జమిలి ఎన్నికల ద్వారా జాతీయ స్థాయి అంశాలను ముందుపెట్టి రాష్ర్టాల్లో అధికారం సాధించడంతోపాటు కేంద్రంలో ప్రభుత్వాన్ని ఏర్పాటు చేయాలన్నది బీజేపీ వ్యూహమని విశ్లేషకులు అంటున్నారు. ఇందులో భాగంగానే జ‌మిలీ ఎన్నిక‌ల అంశంపై తమ అభిప్రాయాన్ని తెలియజేయాలని ఎన్నికల సంఘాన్ని కేంద్ర ప్రభుత్వం కోరనున్నట్టు అధికార వర్గాలు వెల్లడించాయి. త్వరలో లా కమిషన్ నివేదిక రానున్న నేపథ్యంలో కేంద్రం ఈసీ అభిప్రాయాన్ని తీసుకోనున్నట్టు తెలిసింది. 2019, 2024లో రెండు విడుతలుగా లోక్‌సభకు, అసెంబ్లీలకు జమిలి ఎన్నికలు నిర్వహించాలని లా కమిషన్ సిఫారసు చేసే అవకాశం ఉన్నది. జమిలి ఎన్నికల అంశంపై లా కమిషన్ తన నివేదికను ఈ నెలలో కేంద్ర న్యాయశాఖకు సమర్పించనుంది. మరోవైపు రెండు విడుతల్లో జమిలి ఎన్నికలు నిర్వహించాలని సూచిస్తూ నీతి ఆయోగ్ రూపొందించిన నివేదికను కూడా ఎన్నికల సంఘం అభిప్రాయం కోసం కేంద్రం పంపింది.

కేంద్ర ప్రభుత్వం ప్రతిపాదిస్తున్న ఒకే దేశం.. ఒకే ఎన్నిక (వన్ నేషన్.. వన్ ఎలక్షన్) సిద్ధాంతానికి ఒక రూపాన్ని కల్పిస్తూ 2019లో ప్రారంభమయ్యే విధంగా లోక్‌సభ, అసెంబ్లీలకు రెండు విడుతల్లో జమిలి ఎన్నికలు నిర్వహించాలని లా కమిషన్ సిఫారసులను సిద్ధంచేస్తోంది. లా కమిషన్ నివేదిక ప్రకారం రెండో విడుత జమిలి ఎన్నికలు 2024లో జరిగే అవకాశం ఉంది. 2021 వరకు ఎన్నికలు జరుగాల్సి ఉన్న రాష్ర్టాలకు మొదటి దశలో భాగంగా 2019లో ఎన్నికలు నిర్వహించాలని నివేదిక ప్రతిపాదిస్తున్నది. మొదటి దశలో ఎన్నికలు జరుగనున్న రాష్ర్టాల్లో ఆంధ్రప్రదేశ్, తెలంగాణ, అసోం, బీహార్, మహారాష్ట్ర, మధ్యప్రదేశ్ రాష్ర్టాలు ఉండనున్నాయి. 2024లో జరుగునున్న రెండో విడుత జమిలి ఎన్నికల్లో ఉత్తరప్రదేశ్, గుజరాత్, కర్ణాటక, ఢిల్లీ, పంజాబ్ రాష్ర్టాలు ఉండనున్నాయి. లోక్‌సభ ఎన్నికలతోపాటు ఆయా రాష్ర్టాల అసెంబ్లీలకు ఎన్నికలు నిర్వహించాలంటే అసెంబ్లీల కాలపరిమితిని పొడిగించాల్సి లేదా తగ్గించాల్సి ఉంటుంది. దీనికోసం రాజ్యాంగానికి, ప్రజాప్రాతినిధ్య చట్టానికి సవరణలు చేయాల్సి వస్తుంది. మరోవైపు ఎన్నికల సంఘం సూచించిన విధంగా అవిశ్వాస తీర్మానం తర్వాత విశ్వాస తీర్మానం కచ్చితంగా ఉండాలని నివేదిక సూచిస్తున్నట్టు సమాచారం. దీనివల్ల ప్రత్యామ్నాయ ప్రభుత్వం ఏర్పాటు చేసే సంఖ్య ప్రతిపక్షాల వద్ద లేనప్పుడు ప్రభుత్వం కూలిపోయే పరిస్థితి ఉండదు.

 

రాజకీయ వార్తలు

 

సినిమా వార్తలు