కేసీఆర్‌ది ఆంధ్రాపాల‌నే !

కేసీఆర్‌ది ఆంధ్రాపాల‌నే !

తెలంగాణ ముఖ్యమంత్రి కేసీఆర్‌పై జేఏసీ చైర్మన్ ప్రొఫెసర్ కోదండరాం మ‌రోమారు తీవ్ర స్థాయిలో ధ్వజమెత్తారు. అమరుల స్ఫూర్తియాత్ర మెదక్ జిల్లా రామాయంపేట మండలంలోని నిజాంపేటకు చేరుకున్న బస్సుయాత్రకు ప్రజలు, జేఏసీ నాయకులు ఘనస్వాగతం పలికారు. ఈ సందర్భంగా అక్కడ సభలో కోదండరాం మాట్లాడుతూ ప్రభుత్వ పాలన తీరును తప్పుబట్టారు. గత ఆంధ్రా పాలకుల మాదిరిగానే కేసీఆర్ పాలన ఉందని ఆరోపించారు. స్వ‌రాష్ట్రంలో కూడా తెలంగాణ బిడ్డ‌ల ఆక్రంద‌న‌ల‌ను ప‌ట్టించుకోవ‌డం లేద‌ని, ఎన్నో స‌మ‌స్య‌లు ఇంకా ప‌ట్టిపీడిస్తున్నాయ‌ని త‌ద్వారా ఆంధ్రాపాల‌న‌ను గుర్తుకుచేస్తున్నాయ‌ని కోదండ‌రాం అన్నారు. తెలంగాణ వచ్చినా దివంగత జయశంకర్ ఆశయాలకు కొనసాగించేందుకు ప్రభుత్వంపై పోరుకు సిద్ధమయ్యామని ప్రకటించారు.

తెలంగాణ వస్తే ప్రజల సమస్యలు పరిష్కారమవుతాయని, నిరుద్యోగ యువతకు ఉద్యోగాలు వస్తాయని భావించాం కాని నేటి ప్రభుత్వం అనుసరిస్తున్న ప్రజావ్యతిరేక విధానాల మూలంగా ప్రజలు సమస్యలతో సతమతమవుతున్నారని కోదంండ‌రాం అన్నారు. తెలంగాణ ప్రభుత్వంలో అధికారం కొందరి చేతుల్లోనే కొనసాగుతోందని, పాలకులు వ్యక్తిగత లాభా ల కోసం అధికారాన్ని దుర్వినియోగం చేస్తున్నారని ఆయన ధ్వజమెత్తారు. ఉద్య మ సమయంలో కెసిఆర్ ఎన్నో మాయమాటలు చెప్పారని, వాటిని నమ్మి ఆయనకు సాయం చేశామన్నారు. తెలంగాణ వస్తే నీళ్లు, నియామకాలు, నిధులన్నీ మనకే దక్కుతాయని అందరూ భావించామని కానీ దానికి భిన్నంగా ప‌రిపాల‌న ఉంద‌న్నారు.

రాష్ట్రంలోని సమస్యలను ప్రభుత్వానికి వివరించినా వాటి పరిష్కారానికి చర్యలు తీసుకోవడంలేదని కోదండ‌రాం ఆరోపించారు.కులవృత్తులను ఆదుకుంటామంటూనే వారికి అన్యాయం చేస్తున్నారని అన్నారు. గొల్లకుర్మలకు సబ్సిడీ ద్వారా గొర్రెలను పంపిణీ చేస్తామని కేసీఆర్ లబ్ధిదారుల వాటాతో నిరుపేద గొల్లకుర్మలు పథకానికి దూరమవుతున్నారని అన్నారు. 90 వేలు సబ్సిడీ ఇస్తామని చెపుతున్నారని, అంతవరకే గొర్రెలను ఇవ్వాలని డిమాండ్ చేశారు. గొల్లకుర్మలను లాటరీ పద్ధతిలో ఎంపిక చేసే విధానం బాగానే ఉందని, మరి సబ్సిడీ ట్రాక్టర్లను లాటరీ పద్ధతిలో ఎందుకు ఎంపిక చేయలేదని కోదండ‌రాం సూటిగా ప్రశ్నించారు.

తెలంగాణ సిద్ధించినా గ్రామీణ ప్రాంతాల్లో యువతకు ఉపాధి లేక అల్లాడుతున్నారని వారికి ఉద్యోగ, ఉపాధి అవకాశాలు చూపాల్సిన భాధ్యత రాష్ట్ర ప్రభుత్వంపై ఉందని కోదండ‌రాం అన్నారు. ఉద్యోగాల నోటిఫికేషన్లు రాకపోవడంతో నిరుద్యోగులు ఇబ్బందులు పడుతున్నారని, తెలంగాణ వచ్చాక రైతులకు పూర్తి న్యాయం జరగడం లేదన్నారు. రేషన్‌కార్డులు, పింఛన్ల పంపిణీకి కేంద్రం ఫుడ్‌సెక్యూరిటీ చట్టాన్ని తెచ్చిందని, ఆ దిశగా అందరికీ న్యాయం జరిగే విధంగా పోరాటం చేస్తామని కోదండ రాం తెలిపారు. రుణమాఫీ అంటూనే బ్యాంకు అధికారులు కొత్త రుణాలు ఇవ్వడంలేదని, పాత రుణాల మాఫీకి పత్రాలు తేవాలని రైతులను బ్యాంకర్లు ఇబ్బందులకు గురిచేస్తున్నారని ఆరోపించారు. రాష్ట్రంలో మెజార్టీ ప్ర‌జ‌లు ఆధార‌ప‌డి ఉన్న వ్యవసాయానికి విధానం లేదని కోదండ‌రా ఆరోపించారు. వలసజీవుల బతుకులకు బతుకుదెరువు చూపించాల్సిన బాధ్యత ప్రభుత్వంపై ఉందన్నారు. ప్రభుత్వం ప్రజల కోసం అధికారం చేయాలని సూచించారు. నాయకులు నిస్వార్థంగా పనిచేయాలని హితవు పలికారు.

 

రాజకీయ వార్తలు

 

సినిమా వార్తలు