ప్చ్‌... క్రేజు రావట్లేదు తేజూ!

ప్చ్‌... క్రేజు రావట్లేదు తేజూ!

'తేజ్‌ ఐ లవ్యూ' చిత్రానికి ఫుల్‌గా క్రేజ్‌ తీసుకురావాలని పబ్లిసిటీ ఎప్పుడో స్టార్ట్‌ చేసేసారు. అయితే ఎప్పుడో కాలం చెల్లిపోయిన టెక్నిక్కులతోనే పబ్లిసిటీ చేస్తూ పోవడం వల్ల ఈ చిత్రానికి ప్రత్యేకమైన క్రేజేమీ రాలేదు. మరో రెండు రోజుల్లో రిలీజ్‌ వున్నా కానీ ఇంతవరకు ఈ చిత్రం తప్పక చూడాలనే ఫీలింగ్‌ అయితే తీసుకురాలేకపోయారు.

పబ్లిసిటీ పరంగా కొత్త కొత్త టెక్నిక్కులు ఫాలో అవుతూ సినిమాలని వైరల్‌ చేసేస్తోన్న ఈ ట్రెండ్‌లో తేజ్‌ యూనిట్‌ ఆ నాడి పట్టలేకపోయారు. అసలే సాయిధరమ్‌తేజ్‌కి ఇటీవల హిట్టే లేకపోవడం కూడా ఈ చిత్రానికి మైనస్‌ అయింది. అతను చేసిన నక్షత్రం, ఇంటిలిజెంట్‌ లాంటి చిత్రాలు ప్రేక్షకులని భయభ్రాంతులకి గురి చేయడంతో 'తేజ్‌' టాక్‌ తెలిసాక కానీ చూడరాదని డిసైడైనట్టున్నారు. ఆడియో కూడా హిట్‌ కాకపోవడంతో, కరుణాకరన్‌కి ఇప్పటి ప్రేక్షకులతో అంత టచ్‌ లేకపోవడంతో 'తేజ్‌ ఐ లవ్యూ' క్రేజ్‌ పరంగా ఎలాంటి ఫార్వర్డ్‌ స్టెప్‌ వేయలేకపోయింది.

ఆఖరి అస్త్రంగా బిగ్‌బాస్‌ హౌస్‌లోకి వెళ్లి ప్రమోట్‌ చేయడానికి తేజు, అనుపమ కలిసి వెళుతున్నారట. ఆ ఎపిసోడ్‌ గురువారం ప్రసారమవుతుందట. ఇక తేజ్‌తో పాటే విడుదలవుతోన్న పంతం చిత్రానికి కూడా ఎలాంటి బజ్‌ లేదు. గోపీచంద్‌కి హిట్లు లేకపోవడానికి తోడు ఈ చిత్రం ప్రమోషన్స్‌ కూడా వీక్‌గా వుండడంతో పంతం గురించి కూడా అంత ఆసక్తి కనిపించడం లేదు. రేపు రిలీజ్‌ వున్నా కానీ అడ్వాన్స్‌ బుకింగ్‌ పరంగా అసలు సందడే వున్నట్టు లేదు.