ఇద్దరు మిత్రులు.. ‘అజ్ఞాతవాసి’పై మాట్లాడతారా?

ఇద్దరు మిత్రులు.. ‘అజ్ఞాతవాసి’పై మాట్లాడతారా?

మూడు నెలల కిందట ‘అజ్ఞాతవాసి’ ఆడియో వేడుక ఎంత వైభవంగా జరిగిందో తెలిసిందే. అందులో త్రివిక్రమ్ శ్రీనివాస్ ప్రసంగం వింటే అతనో కళాఖండం తీశాడేమో అన్న భావనే కలిగింది. ఈ చిత్రంలో పని చేసిన వాళ్ల నుంచి.. మరికొందరు దిగ్గజాల నుంచి నుంచి తానేం నేర్చుకున్నానో చెబుతూ తనదైన శైలిలో ఒక అద్భుత ప్రసంగం చేశాడు త్రివిక్రమ్.

కెరీర్లో పతాక స్థాయి అందుకున్న సమయంలో తాను ఈ స్థాయికి చేరడానికి సహకరించిన అందరికీ కృతజ్ఞతలు చెబుతున్నట్లుగా అనిపించింది ఆ ప్రసంగం చూస్తే. ఆ ప్రసంగం తర్వాత ‘అజ్ఞాతవాసి’పై అంచనాలు మరింత పెరిగాయి. కానీ తీరా చూస్తే ఆ సినిమా ఏమైందో తెలిసిందే.

కట్ చేస్తే ఈ మూడు నెలల్లో త్రివిక్రమ్ ఎక్కడా అడ్రస్ లేడు. అతను కానీ.. పవన్ కళ్యాణ్ కానీ ‘అజ్ఞాతవాసి’ గురించి ఒక్క ముక్క మాట్లాడింది లేదు. మునిగిపోతున్న సినిమాను ప్రమోట్ చేయడానికి కాస్తంత సాయం కూడా చేయలేదు ఆ ఇద్దరూ. ఇప్పుడు ఇన్ని రోజుల తర్వాత మళ్లీ ఆ ఇద్దరు మిత్రులు ఒకే వేదిక పంచుకోబోతున్నారు. తమ స్వీయ నిర్మాణంలో తెరకెక్కిన ‘చల్ మోహన రంగ’ ప్రి రిలీజ్ ఈవెంట్లో పాల్గొనబోతున్నారు. మరి ఈ వేడుకలో వీళ్లిద్దరూ అసలేం మాట్లాడతారన్న ఆసక్తి అందరిలోనూ ఉంది. ‘అజ్ఞాతవాసి’ ఆడి ఉంటే ఆ జోషే వేరుగా ఉండేది.

దాని గురించి పాజిటివ్‌గా మాట్లాడి ‘చల్ మోహన రంగ’ ముచ్చట్లలోకి వెళ్లి ఉండొచ్చు. కానీ అది తేడా కొట్టేసింది. అలాగని దాని గురించి పూర్తిగా అవాయిడ్ చేసి మాట్లాడినా ఇబ్బందే. ఈ నేపథ్యంలో ఇద్దరు మిత్రుల్లో ఎవరేం మాట్లాడతారో చూడాలి. పవన్ అయినా మామూలుగానే సినిమాల సంగతులు పెద్దగా మాట్లాడడు కాబట్టి ఓకే. కానీ ప్రధాన ఇబ్బంది త్రివిక్రమ్‌కే. అతనెలా మేనేజ్ చేస్తాడన్నదే ఆసక్తికరం.

 

రాజకీయ వార్తలు

 

సినిమా వార్తలు