బాహుబలి వల్లే ఈ తలనొప్పి!

బాహుబలి వల్లే ఈ తలనొప్పి!

2.0 లాంటి భారీ ప్రాజెక్ట్‌ లేట్‌ అయ్యే కొద్దీ నిర్మాతలకి వడ్డీ రూపంలో తడిసి మోపెడవుతుంది. నాలుగు నెలల ఆలస్యమంటే తట్టుకున్నారు కానీ ఇప్పుడు ఏకంగా ఎప్పుడో రిలీజ్‌ తెలియని పరిస్థితి రావడంతో శంకర్‌, లైకా ప్రొడక్షన్స్‌ మధ్య విబేధాలు వచ్చాయట. సినిమాని ఎంతకీ పూర్తి చేయని శంకర్‌పై లైకా వాళ్లు ఫైర్‌ అవుతోంటే రజనీకాంత్‌ అదుపు చేయాల్సి వచ్చిందట.

గ్రాఫిక్స్‌ పరంగా మరీ పర్‌ఫెక్షన్‌కి పోవద్దని, ఇండియన్‌ సినిమాకి ఇంటర్నేషనల్‌ స్థాయి గ్రాఫిక్స్‌ జరిగే పని కాదని నిర్మాతలు వాదిస్తున్నారట. అయితే బాహుబలి తర్వాత రాబోతున్న ఈ చిత్రంపై భారీ అంచనాలున్నాయని, ఎట్టి పరిస్థితుల్లోను దాని కంటే క్వాలిటీ తగ్గరాదని శంకర్‌ పట్టుబట్టి కూర్చున్నాడట. బాహుబలి చిత్రంతో మన మార్కెట్‌ పొటెన్షియల్‌ ఎంత వుందనేది అంత బాగా తెలిసినపుడు కాస్త ఆలస్యం అవడం వల్ల నష్టమేంటని, పైగా రజనీ సినిమా అంటే చైనా, జపాన్‌, మలేషియా తదితర దేశాల్లోను మార్కెట్‌ వుంటుంది కనుక కొన్ని రోజుల వడ్డీ గురించి ఆలోచించవద్దని శంకర్‌ గట్టిగానే చెబుతున్నాడట.

బాహుబలితో సెట్‌ చేసిన స్టాండర్డ్స్‌ని మించి క్వాలిటీ విజువల్స్‌ ఇవ్వాలనేది శంకర్‌ ఆలోచన అట. అయితే వచ్చే ఏడాది వరకు డిలే చేయడానికి మాత్రం లైకా అంగీకరించకపోవడంతో దసరా లేదా దీపావళికి విడుదల చేద్దామని శంకర్‌ మాట ఇచ్చాడట. ఈ చిత్రానికి గ్రాఫిక్స్‌ చేస్తోన్న సంస్థ దివాలా తీయడంతో ఇప్పుడు ఆ బాధ్యతని వేరే కంపెనీ చేతిలో పెట్టడంతో విజువల్‌ ఎఫెక్ట్స్‌ పని మొత్తం మళ్లీ మొదటికి వచ్చిన సంగతి తెలిసిందే.

 

రాజకీయ వార్తలు

 

సినిమా వార్తలు