‘పద్మావతి’ మంటల్ని మరింత పెంచాడే..

‘పద్మావతి’ మంటల్ని మరింత పెంచాడే..

‘పద్మావతి’ సినిమాకు సంబంధించిన వివాదం రోజు రోజుకూ జఠిలమవుతోంది. పార్లమెంటరీ ప్యానెల్ దగ్గరికి వెళ్లాక ఈ వివాదానికి ఒక పరిష్కారం దొరుకుతుందేమో.. దర్శక నిర్మాత సంజయ్ లీలా బన్సాలీకి ఊరట లభిస్తుందేమో అనుకుంటే.. అక్కడ కూడా అతడిపై ముప్పేట దాడి జరిగింది. మీడియాకు ముందే ఈ సినిమా స్పెషల్ స్క్రీనింగ్ పెట్టడంపై సెన్సార్ బోర్డు అతడిపై తీవ్రంగా మండిపడింది.

అక్కడ వివాదం ఓ కొలిక్కి రాలేదు. మరోవైపు నెమ్మదిగా ఇండస్ట్రీ వర్గాల నుంచి బన్సాలీకి మద్దతు తగ్గిపోతోంది. ఈ సినిమాకు వ్యతిరేకంగా ఆందోళనలు ఉద్ధృతమవుతున్న నేపథ్యంలో దానికి అనుకూలంగా మాట్లాడితే తమ సినిమాలకు ఇబ్బంది వస్తుందని ఇండస్ట్రీ ప్రముఖులు సైలెంటుగా ఉంటున్నారు.

ఇలాంటి సమయంలో సీనియర్ నటుడు, భాజపా ఎంపీ ‘పద్మావతి’ మంటల్ని మరింత పెంచే ప్రయత్నం చేశాడు. ఎంతైనా సినీ పరిశ్రమకు చెందిన వాడే కాబట్టి ఈ సినిమాకు అనుకూలంగా మాట్లాడతాడని అనుకుంటే.. వివాదాన్ని మరింత పెంచే వ్యాఖ్యలు చేశాడు శత్రుఘ్న. ‘పద్మావతి’కి వ్యతిరేకంగా ఆందోళనలు చేస్తున్న కర్ణిసేన ప్రతినిధులతో సన్మానం చేయించుకున్న శత్రుఘ్న.. ఈ చిత్రాన్ని ముందు మీడియాకు ఎందుకు చూపించారని మండిపడ్డారు.

ముందు కర్ణిసేనకు.. రాజ్ పుత్‌లకు చూపించాలని.. వాళ్లు అభ్యంతరాలు చెప్పే సన్నివేశాలన్నీ తొలగించాలని.. వాళ్ల మనోభావాల్ని దెబ్బ తీసేలా సినిమా ఉంటే ప్రదర్శనకు అంగీకరించేది లేదని వ్యాఖ్యానించారు. ఈ గొడవ మీద ప్రధానమంత్రి నరేంద్ర మోడీ, సమాచార ప్రసార శాఖా మంత్రి స్మృతి ఇరానీ మౌనం వీడాలని ఆయన కోరారు. కర్ణిసేనతో శత్రుఘ్నకు ఏం ప్రయోజనాలున్నాయో ఏమో కానీ.. ఇండస్ట్రీకి చెందిన వాడై ఉండి.. ‘పద్మావతి’ సినిమాకు వ్యతిరేకంగా వ్యాఖ్యలు చేయడాన్ని బాలీవుడ్ జనాలు తప్పుబడుతున్నారు.

 

రాజకీయ వార్తలు

 

సినిమా వార్తలు