చైతూ టైటిల్లో ఆ చిత్రం చూశారా?

చైతూ టైటిల్లో ఆ చిత్రం చూశారా?

తన కొత్త సినిమా ‘యుద్ధం శరణం’ను విడుదలకు సిద్ధం చేసేసి.. కొత్త సినిమా పనిలో పడిపోయాడు అక్కినేని నాగచైతన్య. తనకు ‘ప్రేమమ్’ లాంటి మంచి విజయాన్నందించిన చందూ మొండేటి దర్శకత్వంలో ఈ సినిమా చేయబోతున్నాడు చైతూ. నిజానికి ‘కార్తికేయ’ లాంటి మంచి థ్రిల్లర్ మూవీతో దర్శకుడిగా పరిచయమైన చందూ.. తన రెండో సినిమాగా స్ట్రెయిట్ మూవీనే చేయాలనుకున్నాడు.

తన సొంత కథతోనే చైతూను కలిశాడు. కానీ అప్పటికే చైతూ ‘ప్రేమమ్’ రీమేక్ చేయాలని ఫిక్సవడంతో అది చేయాల్సి వచ్చింది. ఇప్పుడు తన స్టయిల్లో చైతూతో సినిమా చేయబోతున్నాడు. వీళ్ల కాంబినేషన్లో రాబోయే ‘సవ్యసాచి’ సినిమా టైటిల్ లోగోను ఇప్పటికే లాంచ్ చేసిన సంగతి తెలిసిందే.

ఈ టైటిల్‌కు.. లోగోకు మంచి రెస్పాన్సే వచ్చింది. ఐతే ఆ టైటిల్లోని ఓ సీక్రెట్‌ను చాలామంది పట్టించుకోలేదు. ‘సవ్యసాచి’లోని ‘సా’ అనే అక్షరం మీద అరచేతి సింబల్‌ను గుర్తించారు కానీ.. ఆ అరచేతి లోపల కూడా ఓ చిన్న చిత్రం ఉన్న సంగతి తెలియలేదు. అందులో ఒక పసిబిడ్డ చిత్రం కనిపిస్తోంది. అది తల్లి గర్భంలో ఉన్న బిడ్డలాగా ఉంది. టైటిల్లో ఇలా ఆ చిత్రానికి చోటిచ్చారంటే దానికి కథలో కీలక పాత్ర ఉంటుందని భావిస్తున్నారు.

బేసిగ్గా తనకు సైంటిఫిక్ థ్రిల్లర్లు ఇష్టమని అంటుంటాడు చందూ. ‘ప్రేమమ్’ తర్వాత ‘ఐ డ్రీమ్స్’ అనే సంస్థకు కమిటైన సినిమా సైంటిఫిక్ టచ్ ఉన్న సినిమా అని కూడా చెప్పాడు. ఐతే ఆ సినిమా ముందుకు కదల్లేదు. ఆ బేనర్ స్థానంలోకే ‘మైత్రీ మూవీస్’ వచ్చిందని.. అప్పుడనుకున్న కథనే చైతూతో తీస్తున్నాడని అంటున్నారు. మొత్తానికి టైటిల్ చూస్తే మాత్రం చందూ ఓ కొత్త కథతో రాబోతున్నాడన్నది మాత్రం స్పష్టమైంది.

 

రాజకీయ వార్తలు

 

సినిమా వార్తలు