పోలీసులు డ్ర‌గ్స్ స్టార్ల‌ను ఈ ప్ర‌శ్న‌లు అడుగుతార‌ట‌

పోలీసులు డ్ర‌గ్స్ స్టార్ల‌ను ఈ ప్ర‌శ్న‌లు అడుగుతార‌ట‌

టాలివుడ్‌లో క‌ల‌క‌లం సృష్టిస్తున్న డ్ర‌గ్ రాకెట్ కేసులో బుధ‌వారం నుంచి సిట్ పోలీసులు విచార‌ణ చేప‌ట్ట‌నున్నారు. డ్ర‌గ్స్ రాకెట్‌లో కీల‌క నిందితుడు అయిన కెల్విన్ ఫోన్ లిస్టులో ఉన్న ఫిల్మ్ సెల‌బ్రిటీల‌కు ఇప్ప‌టికే ఎక్సైజ్ శాఖ అధికారులు నోటీసులు జారీ చేశారు. అయితే రేప‌టి నుంచి ప్రారంభం అయ్యే విచార‌ణ‌లో సెల‌బ్రిటీల‌ను ఎలా ప్ర‌శ్నించాల‌న్న అంశాన్ని కూడా ఎక్సైజ్ శాఖ అధికారులు ఫిక్స్ చేసేశారని స‌మాచారం. ఈ మేర‌కు విశ్వస‌నీయ‌వ‌ర్గాల ద్వారా ఈ వివ‌రాల‌తో డ్ర‌గ్స్ స్టార్ల‌ను పోలీసులు ప్ర‌శ్నించ‌నున్న‌ట్లు తెలుస్తోంది

బుధవారం నుంచి సినీప్రముఖుల విచారణ ప్రారంభం కానున్న నేపథ్యంలో డ్రగ్స్ కేసులో వారి ప్రమేయంపై వేయాల్సిన ప్రశ్నలను సిట్ బృందం తయారు చేసుకుంద‌ని, ఆవి ఇలా ఉండ‌నుంద‌ని స‌మాచారం. ``డ్రగ్స్ నిందితుడి వద్దకు మీ ఫోన్‌నంబర్ ఎలా వచ్చింది? ఎన్నిసార్లు ఫోన్లో మాట్లాడారు? ఎప్పుడెప్పుడు మాట్లాడారు? ఒక అజ్ఞాత వ్యక్తితో అన్నిసార్లు మాట్లాడాల్సిన పనేంటి? డ్రగ్స్ కొన్నారా? వేరే వారితో తెప్పించుకున్నారా?`` అనే అంశాలపై సిట్ ఆరా తీయనున్నట్లు తెలిసింది. అలాగే ఫోన్లో మాట్లాడిన గొంతు ఎవరిదనే విషయాన్ని కూడా అవసరాన్ని బట్టి పరిశీలించే అవకాశం ఉంది. విచారణ సందర్భంగా నోటీసులు అందుకున్న ప్రముఖులు చెప్పే ప్రతీ అంశాన్ని వీడియో రికార్డు చేసి కేసు భవిష్యత్ పురోగతికి ఉపయోగించుకునే అవకాశముందని స‌మాచారం.

కాగా, నోటీసులు అందుకున్న సినీ ప్రముఖుల్లో కొందరు సిట్ అధికారులతో ఫోన్ ద్వారా టచ్‌లో ఉన్నట్లు వార్త‌లు వ‌స్తున్నాయి. పలువురు ఆర్టిస్టులు నోటీసుల్లో పంపిన తేదీల్లో విచారణకు హాజరుకావడం కుదురదని, తమకు అసలు డ్రగ్స్ కేసుతో ఎలాంటి సంబంధం లేదని వివరణలు ఇచ్చుకుంటున్నట్లు తెలిసింది. అధికారులు మాత్రం విచారణ సమయంలోనే అంతా చెప్పుకోవాలని సూచిస్తున్నట్లు సమాచారం. నిర్ధారిత తేదీల్లో విచారణకు రావడం కుదురడంలేదని, మరో తేదీకి అవకాశం కల్పించాలని కొందరు కోరుతున్న నేపథ్యంలో వారు విచారణకు వచ్చే అవకాశాలు తక్కువగా ఉన్నట్లు తెలుస్తోంది. ఈ కేసులో రేపు మొద‌ట డైర‌క్ట‌ర్ పూరీ జ‌గ‌న్నాథ్‌ను ప్ర‌శ్నించనున్నారని సమాచారం.

 

రాజకీయ వార్తలు

 

సినిమా వార్తలు