వెంకీ.. అభిమానులు నిద్ర లేచారయ్యా

వెంకీ.. అభిమానులు నిద్ర లేచారయ్యా

20వ శతాబ్దం ఆఖరు వరకు తెలుగులో సీనియర్లదే హవా. ప్రస్తుత సూపర్ స్టార్లు పవన్ కళ్యాణ్, మహేష్ బాబు అప్పటికే అరంగేట్రం చేసినా.. అప్పటికి పెద్ద స్టార్లుగా ఎదగలేదు. చిరంజీవి టాప్ లెవెల్లో ఉంటే.. బాలకృష్ణ, నాగార్జున, వెంకటేష్ తమ స్థాయిలో జోరు చూపించేవాళ్లు. ఐతే రాను రాను సీనియర్ల హవా తగ్గిపోయింది. తర్వాతి తరం హీరోల జోరు పెరిగిపోయింది. చిరంజీవి కొంచెం క్రేజ్ తగ్గుతున్న టైంలోనే సినిమాలకు దూరమైపోయాడు. బాలయ్య వరుస ఫ్లాపులతో వెనుకబడ్డాడు. నాగార్జున ప్రయోగాల బాట పట్టడంతో మాస్‌లో క్రేజ్ తగ్గింది. వెంకటేష్ కూడా మాస్ క్యారెక్టర్లు బాగా తగ్గించేసి ఫ్యామిలీ టైపు సినిమాలకే పరిమితం కావడం.. దీనికి తోడు కొన్ని డిజాస్టర్లు ఎదురుకావడంతో స్లో అయిపోయాడు.

ఐతే ఈ మధ్య సీనియర్లు మళ్లీ ఒక్కొక్కరుగా పుంజుకుంటున్నారు. బాలయ్య సింహా, లెజెండ్ సినిమాలతో మళ్లీ తన స్టామినా చూపించగా.. నాగార్జున మనం, సోగ్గాడే చిన్నినాయనా, ఊపిరి సినిమాలతో టాప్ ఫామ్‌లోకి వచ్చేశాడు. ఇక చిరంజీవి ఎలాగూ తన రీఎంట్రీ మూవీతో కావాల్సినంత క్రేజ్ తెచ్చుకుంటాడనడంలో సందేహం లేదు. ఇక ఈ లీగ్‌లో మిగిలింది వెంకటేషే. షాడో, మసాలా లాంటి డిజాస్టర్లతో కుదేలైన వెంకీ ‘దృశ్యం’ సినిమాతో సక్సెస్ సాధించినా.. అది ఆయన అభిమానుల్నేమీ ఉర్రూతలూగించలేదు. అసలు గత కొన్నేళ్లలో వెంకీ అభిమానులు బాగా సైలైంటైపోయారు. ఆయన మార్కెట్ కూడా దెబ్బ తింది.

ఈ నేపథ్యంలో మళ్లీ తన అభిమానుల్లో ఉత్సాహం నింపే.. ఈ తరం ప్రేక్షకుల్లోనూ ఫాలోయింగ్ పెంచే సినిమా కోసం చూస్తున్నాడు వెంకీ. ‘బాబు బంగారం’ అలాంటి సినిమానే అవుతుందన్న అంచనాలున్నాయి. ఈ ట్రెండుకు తగ్గట్లుగా సినిమాలు తీసే మారుతితో జత కట్టి వెంకీ మంచి నిర్ణయమే తీసుకున్నాడని చెప్పాలి. ‘బాబు బంగారం’ టీజర్ ఒక పాజిటివ్ వైబ్రేషన్స్ క్రియేట్ చేసింది. ‘అయ్యో అయ్యో అయ్యయ్యో’ అన్న వెంకీ పాపులర్ డైలాగ్‌ను ఇందులో పెట్టడం ద్వారా ఆయన అభిమానులకు ఈ సినిమా ఇన్‌స్టంట్‌గా కనెక్టయిపోయేలా చేశాడు. వాళ్లలో ఒక్కసారిగా ఉత్సాహం వచ్చేసింది. సినిమా కోసం ఎప్పుడెప్పుడా అని ఉత్సాహంగా ఎదురు చూస్తున్నారు. సినిమా అంచనాలకు తగ్గట్లుగా ఉంటే వెంకీ కెరీర్లోనే ‘బాబు బంగారం’ బిగ్గెస్ట్ హిట్‌గా నిలవడం ఖాయం.